Hondartzak eta txokoak

 

 

 

iparralde

Opor-egun bero, eguzkitsu eta lasai baterako, zaila izanen da hondartza baino eskaintza hoberik atzematea. Beraz, Lapurdiko kostaldeko hondartza eta txoko batzuk iradokiko dizkizugu uda honetarako. Leku batzuk ezagunak dira kanpotar ororentzat, baina beste batzuk bertako jendeak baino ezagutzen ez dituztenak izanen dira; hortaz, bai sendiarekin, bai lagunekin edo bikotekidearekin goxoan igarotzeko plana proposatuko dizugu. Hendaia, Ziburu, Donibane Lohizune eta Getarian izan gara, eta banan-banan erakutsiko dizkizugu zuretzat aurkitu ditugun txokoak. Egoitz Zelaia.


Hendaia
Ondarraitz da Hendaiako hondartza nagusia. 3,5 kilometro ditu aldetik aldera. Euskal Herriko hondartzarik handienetakoa da. Jendez mukuru izaten da, eta, hala ere, denentzat dago tokia.
Ondarraitzez gain, baina, Hendaiak baditu hain ezagunak ez diren txokoak. Hain zuzen, jende samaldatik ihes egiteko txoko aproposak:
Lehena Txingudiko badian da, izen bereko bulebarraren hasieran, Endaika arraun elkartearen ondoan. Hondartza txikitxoa da eta, errepide alboan izanagatik, leku arras lasaia da. Harea eta belarra nahasten ditu, eta badiako ur bareek egiten dute egokia ume txikiak dituzten familiendako.
Hurrengo txokoak abentura sena galdetzen edo eskatzen du, izan ere,  ur-beheretan  edo mendi bidetik baino ezin izanen gara igaro bertara. Ondarraitz hondar­tzaren bukaeran, Dunbarriak igaro eta gibelean edo atzealdean bada hondartza polit eta intimoa. Loiako badia hots egiten diote. Kortsario eta piraten garaiak ekartzen ditu gogora. Bertara joaten den jende gehienak nudismoa egiten du, eta leku zoragarria da benetan.  

Ziburu
Ziburuk berak ez du hondartzarik, Zokoako hondartza da Ziburukoa. Hondartza txiki bezain panpoxoa da, aurkitzekoak dira, baina, bere ertzetan dituen senadiak edo kalak.
XVII. mendeko gotorlekua eta itsasargia dira Zokoako ikur garrantzitsuenak. Gotorlekuaren oinetan, hain zuzen, badira bi kala txiki, hondar fin-finekoak, eta kirola egiteko eta aisialdirako erabili ohi den portua dago bertan. Alemanek, II. Mundu Gerran, itsaspekoen base bat ezarri omen zuten bertan. Goxo-goxo egoteko toki aproposa da.
Hondartzaren beste muturrera joaten bagara, Zibururako bideari jarraituz, beste bizpahiru kala badira. Ipurmasailen antza har dakieke. 

Donibane Lohizune
Ziburu eta Donibaneko portua utzi eta Donibane Lohizuneko hondartzara heldu gara. Hiriko hondartza edo hondartza handia esaten diote. Garai bateko nobleziak maite zuen txoko hau ere.
Erdi-erdian den hotela atzean utzi eta Santa Barbarako itsasargirat joanez gero, hondartzatxo bat ikus daiteke, Donibaneko jendetzarengandik ihes egiteko txoko polita. Itzalaren xerka bazabiltzate, mendi magalean eserleku eta zuhaizpe ederrak daude, eta, itsasargira igoko bazarete, inguruko paraje ederrez gozatzeko moduan izanen zarete. Ez zaizue damutuko.
Itsasertzetik Getariarako bidea jarraituz gero, beste hiru hondartza zoragarri daude: Erromardiko hondartza, Lafiteneko hondartza eta Maiarkobaitako hondartza, baina horiek aurkitzea zuen esku utziko dugu.
Getaria
Gipuzkoakoaz gain, Lapurdin ere bada Getaria. Inguru hauetara, egun, Frantziako estatuan eta mundu mailan puri-purian dabiltzan artista zein pertsonaia mediatikoak gerturatzen dira. Frantzian, beraz, Getaria hau gipuzkoarra baino ezagunagoa da.
Hondartza, kala eta txoko bikainak daude Getariatik Bidartera zein Miarritzetik Angelura. Baten bat azpimarratzekotan, Zenitzeko hondartza aipatu behar da. Babestutako itsasertz baten barruan dago, babespean dauden animaliak daude, eta ez dago soroslerik. Surfean aritzeko leku aproposa da, baita egun-pasa ederra egiteko ere. Harea eta harkai­tzezko hondartza da, eta eremu ezin hobea du.

Beste hainbeste leku edo txoko eder baditu Lapurdiko kostaldeak, baina ezingo ditugu, bada, guztiak azaleratu; txokook norberak topatzeak ere xarma handia du.