Bidesarien aurka, oraingoan Durangaldean

autopista

A-8 autobideko bidesariak aspalditik ari dira zeresana ematen. Hala, guztien desagerpena eskatzeko, A-8 Doan plataforma sortu zen pasa den hamarkadaren hasieran. Xede hura ez da lortu oraindik, baina harrezkero bidesarien aurkako aldarriak beti egon dira mahai gainean, oihartzun handiagoaz ala txikiagoaz. Auspotzen azkena Durangaldeko plataformarena izan da: sinadura bilketari ekin dio change.org webgunean, eskaria hainbat udaletara eta Bizkaiko Batzar Nagusietara eramateko, Durangaldeko bidesarietan igoera gehiagorik ez! AP-8 libre! lelopean. Izan ere, urte hasierako % 2,5eko igoera izan da erabiltzaile asko sutan jarri dituen erabakia. Haien hitzetan, “diskriminazioa” pairatzen dute Durangaldeko zein Lea Artibaiko herritarrek, “AP-8 autobidearen Bizkaiko zatian bidesaria ordaintzen bakarrak” direlako: “Autobide honen Bizkaiko zatiaren mantentze-lana gure lepo egiten da, baina behin eta berriro aurkitzen ditugu errailak moztuta, auto pilaketak ordainlekuetan, lanak...”. Atsotitzak dioen moduan, oztopo gabeko biderik ez, nonbait.

Ingurumena

artzantzaArtzaintza uzteak katean eragingo ditu ondorio ekologiko eta sozioekonomikoak

Euskal Herrian ez ezik eskualde atlantikoko mendietan ere gutxitzen ari den jarduera izanik, EHUko eta Neiker-Tecnaliako ikertzaile talde batek artzaintzari uzteak euskal mendietako landare-dibertsitatean eta ekintza mikrobianoan duen eragina aztertu du. Artzaintzaren ekologia eta landarediaren eta belarjaleen arteko elkarreragina izeneko ikerketa taldeak ondorioztatu duenez, mendi artzaintza murrizteak ondorio ekologikoak eragiten ditu: “Aldaketa garrantzi-tsuak dakartza lurzoruaren konposizio begetal eta mikrobianoan, eta, ondorioz, galera dibertsitate floristikoan eta larrearen kalitate nutritiboan, baita CO2 isurien gehikuntza ere”. Horrek, halaber, arlo sozioekonomikoan ere eragina duela nabarmendu dute ikertzaileek. EHUko ikerlari Arantza Aldezabalen hitzetan, “elkarrekintza konplexuz beteriko kate-prozesua da, eta esnea eta gazta bezalako mendiko elikagai tradizionalen kalitatean eta ekoizpenean ere ondorioak izan ditzake”. Besteak beste, artzaintzaren baldintzak kaltetuko lituzke eta, hortaz, hainbat nekazari-gunetako ekonomia ere bai. Arlo sozioekonomikoan izan ditzakeen eragin horiek guztiak aurrerantzean aztertuko dituzte, orain artean ekologia eta ingurumen alorra izan baitute aztergai nagusi. 2005ean hasi zuten ikerketa. Aralarreko larreetan bi eremu itxi zituzten (bata Oiduin, 860 metroko altueran, eta bestea Alotzan, ia 1.300 metroko altueran), inguruko belarjaleak ez zitezen lursail horietan sartu. 2010etik, bi eremuetako lurrak aztertu dituzte, eta artzaintza normaltasunez garatu zen tokiekin konparatu. Bi itxituretako  lurrak erritmo desberdinean garatu dira. Ikertzaileen ustez, altitudeak eragina izan du aldaketak gertatzeko orduan. Astiroago edo azkarrago jazo arren, aldaketak bietan antzeman dituzte.

Musika

elvisZein dira historiako musika talderik onenak?


Zaletasun kontuetan, esaera zaharrak dioen moduan, zenbat buru, hainbat aburu. Zaila izaten da subjektibotasunari iskin egitea. Nolanahi ere, ez dira gutxi nolako edo halako gaiaren inguruan egiten diren zerrendak: historiako filmik onenak, abesti ederrenak... Berriki, Rolling Stone aldizkariak historiako hamar musika talde eta abeslari onenen zerrenda osatu du. Horretarako, aldizkariko kideen zaletasunak hartu dituzte oinarri, baita musika taldeek beste artista batzuengan izandako eragina ere. Horren arabera, The Beatles talde ingelesa paratu dute zerrendaren lehen postuan. Bigarren postua, aldiz, Bob Dylan musikariari egokitu zaio, eta Elvis Presleyri hirugarrena. Ondoren etorri dira, hurrenkera honetan, The Rolling Stones, Chuck Berry, Jimmy Hendrix, James Brown, Little Richard, Aretha Franklin eta Ray Charles. Bistakoa denez, kultura anglosaxoiko erreferentziak dira jaun eta jabe zerrendan. Bertan ageri diren izenen garrantzia eta hurrenkera eztabaidaezina izango da batzuentzat, eta oso eztabaidagarria beste askorentzat. Baina, berriz ere atsotitzen mundu aberatsera jota, begi guztiek ez dute berdin ikusten... ezta belarri guztiek berdin entzun ere!

Bitxikeria

etzandaIdazmahaian etzanda ere lan egin daiteke

Idazmahaiaren aurrean denbora luzez jarrera berean eserita egoteak ez dio batere onik egiten gorputzari. Jarrera egokia izan ezean, giharretako min eta lesioak garatzeko aukera handia izaten da. Arazoari irtenbidea eman nahian, AEBetako Altwork enpresak idazmahai berezia sortu du, aulki eta guzti: etzanda lan egitea ahalbidetzen du. Finean, eserita ez ezik, beste zenbait jarreratan ere lan egiteko aukera eskaintzen du. Besteak beste, ia erabat etzanda. Hau da, erabiltzaileak gorputza idazmahaiko ordenagailura egokitu beharrean, ordenagailua egokitzen zaio erabiltzailearen jarrerari. Horretarako, beso artikulatuak baliatzen ditu, baita imanak ere. Azken horiei esker, posizioa edozein dela ere, teklatuak eta saguak mahaiari lotuta jarraitzen dute. Gainera, kafe katilua uzteko mahai txiki bat ere badu albo batean. Altwork enpresa duela bost urte hasi zen proiektua garatzen. Enpresako sortzaileetako bat konturatu zen eserlekuan etzanda erosoago jarduteaz gain, produktiboagoa zela lanean. Bost urte eta gero sortu dute idazmahai berezia, eta dagoeneko merkaturatu dute AEBetan. Hori bai, erosotasunak eta balizko eraginkortasunak badute beren ordaina: aski garestia da. Zehazki, 4.900 dolar balio ditu idazmahaiak. Halako prezioarekin, ordenagailu aurreko gorputzaren jarrerak tentuz zaintzen jarraitu beharko!

 

Hedabideak

hedabideakElkarlana, Euskal Hedabideen Behategia sustatzeko

Hekimen elkarteak eta hainbat ikerketa taldek 2012an hasitako bideak bultzada sendoa jaso berri du urtarrilean, Hekimenek, UPV/EHUk, Mondragon Unibertsitateak eta Deustuko Unibertsitateak Euskal Hedabideen Behategia sustatzeko sinaturiko elkarlan akordioari esker. Hitzarmenaren bidez, babes instituzionala jaso du egitasmoak. Era berean, lankidetza markoa ezarrita geratu da erakunde akademikoen eta euskal hedabideen artean. Ikerketa, berrikuntza eta prospektiba garatzea izango dira elkarlanaren oinarri, baita euskal hedabideen datu basea sortzea eta euskal hedabideei buruzko topagunea garatzea ere. Euskal hedabideen sektorea indartsuagoa eta eraginkorragoa egitea du helburu lankidetzak. Zehazki, hiru helburu finkatu ditu hitzarmenak. Lehena, euskal hedabideen arloko ikerketa eta berrikun-tzarako gune bat zehaztea, lankidetzarako sinergiak eta dinamikak hobetzeko. Bigarrena, unibertsitatearekin elkarlanean euskal hedabideen balioa sustatzea, berrikuntzarako edo ezagutzaren transferentziarako estrategiak elkarbanatuta eta gizartearekiko loturak sendotuta. Eta azkenik, euskal hedabideen eta haren inguruko ikertaldeen ikusgarritasuna bultzatzea, komunikazioak eta euskarak gizartean daukan zeregina indartuta. Urtarrilaren 14an sinatu zuten akordioa Hekimeneko eta hiru unibertsitateetako ordezkariek, baina haien arteko elkarlana lehenagokoa da. Azken hiru urteotan, hiru unibertsitateetako ikerketa taldeekin egindako lanaren ondorioz hainbat egitasmo eta ikerketa lan bultzatu eta garatu dira.