'Ikasi eta bizitakoa, ez duzu ahaztuko’ erreportajea aurkeztear

aekalbisteakJoan den martxoaren 12an, AEKren udako barnetegietan ibili den jendearentzako hitzordu berezia antolatu zuen AEK-k Iruñean. Aitzakia nagusia izan zen udako barnetegien inguruan laster hedatuko den Ikasi eta bizitakoa, ez duzu ahaztuko erreportajearen aurkezpena. 2015eko udan grabatu zuten hainbat barnetegitan, eta Iruñean eskaini zitzaien aurrerapen pribatua barnetegi horietan zein gainerakoetan, iaz nahiz aurreko urteetan, ibilitako ikasleei. Bestalde, erreportajea ikusteaz gain, barnetegietako 'tribua' batzeko eta elkarren berri edukitzeko abagunea izan zen. Zugarramurdin, Arantzan eta Euskal Herriko hainbat lekutan opor ahaztezinak igaro zituzten iaz erreportajeko protagonista Remiro Tobar familiak, Ana Perezek eta Dabid Romeok, baita beste ikasle askok ere. Hala, euskaltegian ikasitakoa praktikan jarri zuten eta, ia konturatu gabe, egunero eta 24 orduz euskaraz bizi izan ziren. Iruñeko topaketan izan zirenek ederki gozatu zuten erreportajeaz. Beraz, adi egon, ez galdu ikusteko aukera!

Lanpres egitasmoa abian, AHIZEren aholkularitzarekin

AHIZE-AEK hizkuntza aholkularitza zerbitzua Lanpres egitasmoan dabil beharrean, lantokiko prestakuntza euskaraz sistematizatzeko, LANEKI Elkartearekin batera. Egitasmoaren xedea bikoitza da: batetik, baldintza egokiak sortzea Lanbide Heziketako ikasleek euskaraz egin ditzaten Lantokiko Prestakuntza zein Duala; bestetik, enpresak euskalduntzen laguntzeko egitasmoa abian jartzea. Hala, Lanpres proiektuaren egitekoa da gida bat osatzea, euskararen erabilera sustatzeko prozesua sistematizatzeko asmoz, Lanbide Heziketako ikasleek enpresetan egonaldiak egiten dituzten bitartean. Gida apirilaren 18an aurkeztuko da, Bilboko Euskalduna Jauregian antolatu dituzten jardunaldietan. Era berean, www.jakinbai.eus webgunean ere hainbat dokumentu eskainiko dira, ikasleen prestakuntza euskaraz sistematizatzeko prozesuan baliagarriak.

Gaelikoaren alde korrika!

rithMartxoan, Rith 2016 gaelikoaren aldeko lasterketaren laugarren edizioa burutu zen. Cill Droicheadetik (Kildare) abiatu eta 2.000 kilometro baino gehiago egin eta 200 herri zeharkatu ondoren, Dublinen bukatu zen martxoaren 14an. Azken egun horretan, korrikalariek eskuz esku elkarri ematen dioten lekukoaren barruko mezu sekretua irakurri zen, Korrikan bezala. Egoera larrian da gaelikoa, munduan hizkuntza hau hitz egiteko gauza diren pertsonak ez baitira bi milioira iristen. Irlandako lehen hizkuntza ofiziala izan arren, hizkuntza gutxitua da gaur egun, eta are egoera zailagoan dago Ipar Irlandan. Arazoa ikusita, 2010ean, lasterketa honen antolatzaileei AEK-k antolatzen duen Korrikaren “ahizpa irlandarra” egitea bururatu zitzaien, eta AEKren zein Korrikaren laguntza jaso zuten. Rith ez da Korrikaren ahizpa bakarra,  Bretainian Ar Redadeg lasterketa egiten baitute. Aurtengoa, apirilaren 24tik maiatzaren 7ra (St.Ervlan/Naonedetik Lokoal-Mendonera), bretoiaren aldeko ekimenaren laugarren edizioa izango da.

Esaera Zaharren Sopelako Txapelketaren XXIII. edizioa, prest

 

 

 

esaerakEkitaldia apirilaren 9an izango da, Sopelako (Bizkaia)  AEK-ko lagunek antolatua; urtero bezala, talde parte-hartzaileek asmatu beharko dute zein atsotitz ezkutatzen den entzuten duten bertso bakoitzaren atzean. Beti legez, txapelketaren xedea da bertsoekin nahiz esaera zaharrekin aritzea eta euskaraz bikain pasatzea; horretarako, 150 bat lagun elkartu ohi dira.
Lehiaketak saio bi izango ditu. Goizean, multzoka banatuta, tabernaz taberna ariko dira, zeregin hau izango dutelarik: Algortako Bertso Eskolako kideen bertso idatziak entzunda, haien azpian gordetzen den esaera zaharra zein ote den erabaki, atsotitza pentsatu eta zuzen esatea. Ondoren, 15:00ak aldera, herri-bazkaria izango da, Ander Deuna ikastolan. Bazkalostean, berriz, final-erdiak eta finala jokatuko dira, goizeko modu bertsuan: oraingoan, bat-bateko bertsoak adituko dituzte taldeek, Itxaso Paia eta Iñaki Apalategi bertsolarien ahotik.
Adi! Izena emateko azken eguna, apirilaren 4a. Irabazteko prest? Bestela, badakizue: Urri, baina ongi.