Zenbateraino ezagutzen duzue Euskal Herria?

ikamika

Bi astez, euskara ikasi, hobetu eta erabiltzeko aukera izan dute AEKren barnetegi ibiltarian, eta bitartean Euskal Herriko txoko eta bazterrak oinez ezagutzekoa. Baina zenbateraino ezagutzen dugu Euskal Herria? Izan ere, zazpi lurraldeen banaketa administratiboak erabat zatikatzen du euskararen herria. Esaterako, Ipar Euskal Herria Frantziako estatuaren parte izanik eta Hego Euskal Herria Espainiako estatuarena, bien arteko mugak arrakala handia sortzen du, eta ez soilik administratiboki: iritzi hedatua da batzuen eta besteen arteko elkar ezagutza eskasa dela. Hala iruditzen al zaizue? Hegoaldekoek zenbateraino ezagutzen dute Ipar Euskal Herria? Eta Ipar Euskal Herrikoek Hegoaldea? Bizkarra ematen al diogu elkarri?

1. Oriol (Terrassa)
Nik kanpotik ikusten dut; katalana naiz eta ez dut gaia bertatik bertara ezagutzen, nahiz eta Països Catalanseko Rossellóngo kasua antzekoa izan. Ezagutu ditudan Iparraldeko euskaldunek argi daukate beren euskal nortasuna, baina ibiltariaren testuinguruan erraza da hori. Kultura eta ohiturak partekatzen dituztela nabaritzen da.

2. Montse (Sabadell)
Aitortu behar dut, Euskal Herriaz ari garenean, nire iruditerian bai agertzen direla zazpi probintziak, horrela ikasi dugulako euskaltegian, baina errealitatean Hegoaldetik soilik mugitzen gara. Iparraldea ezezagun handia da, urruti dauden bazterrak; eta bertako euskalkia, ia-ia hizkuntza exotiko bat.

3. Elisabeth (Donibane Garazi)
Ibilaldi honekin, Iparraldeko mendi paisaia miresgarriak ezagutu ditugu. Baina nolakoa da tokiko herritarren bizimodua? Anitzek erran duten bezala, ez da lantegirik, bizitegi eraikin handirik ere ez, baina etxe ederrak badira, eta bizi ingurumen paregabea ere bai. Iparraldetik bakarra nintzen, eta gure ezberdintasunez ohartu naiz, bai gobernuen politikarengatik bai gure euskalkiengatik.

4. Eder (Gallarta)
Bi estatuek inposatutako Ipar-Hego arrakalak herri moduan zatitu egin gaitu. Ez dugu elkar behar beste ezagutzen, eta mugaren gaineko zubiak eraikitzeko ordua dela uste dut. Sor ditzagun elkargune berriak Iparraldea eta Hegoaldea behingoz bat izan gaitezen.

5. Nestor (Gasteiz)
Ipar eta Hego Euskal Herriak duten muga administratiboa oztopoa da elkar ezagutzarako, argi dago. Hala ere, ez al du elkar ezagutzak hobetzeko tarterik? Batez ere, Hegoaldean?

6. Tirso (Iruñea)
Hegoaldean oso gutxi ezagutzen da Ipar Euskal Herria. Gehiegitan, arrotz bezala ikusten dugu elkar. Euskararen erabilerak eta herrien arteko ekimenek hau gainditzen lagunduko lukete.

7. Tania (Lizarra)
Oso polita izan da Euskal Herriko leku zoragarriez disfrutatzea hizkuntza eta kultura konpartituz, pausoz pauso bide komuna eginez.

8. Sara (Iruñea)
Uste dut gutxi ezagutzen dugula Ipar Euskal Herria; nik, behintzat, oso gutxi. Esperientzia honek balio du hobeto ezagutzeko, ikuspegiak eta paisaiak ez ezik, kultura ere. Jende euskalduna ezagutu dugu, espero nuena baino gehiago, eta haien euskalkiak ere bai.

9. Iñigo (Barakaldo)
Agerikoa da bi estaturen menpe egoteak erreferentzia kultural desberdinak sortzen dituela (hizkuntza, zinema, telesailak, TB aurkezleak...), eta horrek elkar ezagutza oztopatzen duela.

 

Zaintzen al duzue zuen elikadura?

ikamika

Udan sartuak gara. Ziurrenik, zuen artean edo zuen inguruan bati baino gehiagori entzungo zenizkioten ‘bikini operazioa’ eta antzekoak. Halakoek, baina, egungo kanon estetiko zalantzagarrien etengabeko bonbardaketa izaten dute, askotan, oinarri. Hots, osasun kontua baino, osasuna bera batere kontuan hartzen ez duten arrazoiek. Nolanahi ere, elikadurak gero eta gehiago arduratzen gaituela ukaezina da. Ekaineko AIZU!n egindako elkarrizketan, esaterako, Gabriela Uriarte nutrizionista eta dietistak honela dio: "Ondo jatearekin kezkatuta baino, kontzientziatuago gaude, ikusi dugulako ez ginela ari uste bezain ondo. (...) Gehiegizko pisu eta obesitate tasa handiak betidanik izan dituzten herrialdeetara hurbiltzen ari gara". Zaintzen al duzue zuen elikadura? Orain gehiago arduratzen al zarete elikadura egokia izateaz, duela zenbait urte baino? Arrazoi estetikoei garrantzirik ematen al diezue? Leioako Lamia AEK-ko A2/B1 mailako goizeko taldea.

1. Alberto
Egunero ezin da elikadura zaindu, baina saiatzen naiz, batez ere etxean, osasungarri jaten: barazkiak, arrainak, haragia... Alde horretatik, arazorik ez. Kalean, ordea, zaila da edozein gauza ez jatea, beraz, hori gertatzen denean kirolaren bidez orekatzen dut.
2. Miren Karmele
Barazkiak asko gustatzen zaizkit, arraina ere bai. Frijituak ez zaizkit gustatzen; orduan, ez ditut sarritan prestatzen. Normalean, ondo jaten dut, orekatu eta osasungarri.
3. Ana
Normalean, elikadura zaindu egiten dut; adibidez, barazki asko jaten dut, begetarianoa ez banaiz ere. Elikagai ekologikoak jaten saiatzen naiz, baina esan dezakegu denetarik jaten dudala.
4. Miren
Zorte ona daukat, nire senargaia sukaldaria delako; normalean, etxean, elikadura osasungarria izaten dugu, eta kalitatezkoa, gainera. Beraz, arazo barik osasuntsu bizitzeko.
5. Mari Feli
Nik pentsatzen dut elikadura oso inportantea dela; esate baterako, barazkiak, arraina, okela, arroza, fruta eta lekaleak. Horrekin batera, egunero beharrezkoa da ur asko edatea, kirola edo ariketa fisikoa egitea; ni, behintzat, saiatzen naiz horrela egiten.
6. Unai
Elikadurari dagokionez, denetarik jaten dut: barazkiak, haragia... Hori bai, janari azkarra ez jaten saiatzen naiz, zaila bada ere. Uste dut oso garrantzitsua dela elikadura orekatua izatea, gero zahartzaro osasuntsua izateko.

Donostiak behar al du metrorik?

ikamika

Martxan dira Donostiako metroaren pasabideko lanak. Hirigunea 4,2 kilometroan zeharkatuko du lur azpitik, Easo plazako geltokia eta Lugaritz auzokoa lotuko ditu, eta geltokiak Benta Berrin eta Kontxan izango ditu. Eusko Jaurlaritzak, Gipuzkoako Foru Aldundiak eta Donostiako Udalak bultzatutako proiektuak ika-mika ugari eragin du hasieratik. Kontrakoen iritziz, Donostiak ez du halakorik behar, eta diru publiko ugari xahutuko dela salatu dute. Proiektuaren bultzatzaileek, aldiz, garraio zerbitzu publikoa hobetzeko balioko duela diote. Lanak hasita, kexak ugariak dira donostiarren artean: gehiegizko zarata, arrakalak... Zer uste duzue zuek?
Donostiako Amara Berri AEK euskaltegiko goizeko B1-B2 ikasleak

Gehiago irakurri: Donostiak behar al du metrorik?

Ehiza: bai ala ez?

ikamika

Iragan maiatzean manifestazioa egin zuten ehiztariek Donostian, “ehizatzeko eskubidea” aldarrikatzeko eta ehizaren aurkakoei “errespetua” eskatzeko. Era berean, politikariei eskatu zieten ehiztariak kontuan hartzeko ehiza arautzerakoan. Gipuzkoako Ehiza Federazioak antolatu zuen manifestazioa, baina Arabako eta Bizkaiko ehiztariek ere babestu zuten. Azken urteotan, handitu egin da ehizaren gaineko eztabaida: debekatzea, zorrotzago arautzea... Ehizaren kontrako iritziak ere asko dira. Esaterako, azkenaldian, talde antiespezistek eta animalistek areagotu egin dituzte protestak. Ondorioz, ehiztarien kexak ere ugaritu egin dira. Ehizaren aldekoak zarete zuek? Debekatu, bere horretan utzi, zorrotzago arautu... zer egingo zenukete? Gorbeialdeko AEK-ko Zigoitiko B1-B2 mailako ikasleak

Gehiago irakurri: Ehiza: bai ala ez?

Nola joan dira 21. Korrikaren hasierako eguna prestatzeko lanak?

ikamika

Garesen hasiko da 21. Korrika. Hiru mila biztanle baino gutxiago dituen Izarbeibarko herria nabarmen aldatuko da apirilaren 4an. Goizean goiz hasiko da mugimendu berezia antzematen: furgonetak, autoak, kazetariak, kamerak, urduritasuna, zirrara, jai giroa... Mugimendua, ordea, aspaldi hasi zen garestar asko eta askorentzat, Korrikaren hasiera ez baita aste pare batean antolatzen. Errobi AEK euskaltegiko irakasleek eta ikasleek ondotxo ikasi dute hori, baita Korrikaren hasieran laguntzeko hara hurbildu diren euskaltzale guztiek ere. Eguna heltzear, nola bizi izan duzue hori guztia? Hartu duzue parte 21. Korrikaren hasieraren antolaketan? Eta nolako giroa sumatu duzue herrian?
Izarbeibarko Errobi AEK euskaltegiko B2 mailako arratsaldeko taldea.

1. Javi
Betidanik, Korrikak oso bereziak izan dira niretzat. Aurten gure herrian hasiko denez, ziur nago oso hunkigarria izango dela garestar euskaldun guztiontzat. Duela hil dezente hasi ginen prestaketekin, eta ni boluntario ariko naiz egun horretan. Egun polita pasatuko dugu, ekintzaz eta sentimenduz beteta. Gares herria euskararen mapan jarriko dugu!
2. Ixone
Berria eman zidatenean, zirrara handia sentitu nuen. Orain dela bi urte, seme-alabek lekukoa eraman zuten, eta oso hunkigarria izan zen. Aurten Garesen hasiko dela pentsatzeak izugarri pozten nau! Egunean bertan lan handia egin beharko dugu, bai eskolan bai Korrika ekimenean. Dena bukatutakoan, parranda handia egingo dugu!
3. Esti
Emozio handiarekin bizi izan dut berri hori, oso garrantzitsua baita Korrika gure zonaldean hastea, honela euskarak gurean presentzia handiagoa edukiko duelako. Egun osoan parte hartuko dut antolakuntzan, boluntario, eta herritarrak urduri sumatu ditugu. Gogo handiz hartuko dugu apirilaren 4a. Klika Korrika!!!
4. Xabi
Garesek eta garestarrok emozioz hartu genuen berria, oso inportantea baita Euskal Herriko erdialdean euskara biziberritzen ari dela adierazteko. Egun horretan lan handia egin beharko dugu, baina espero dut ondo pasatzeko astia ere edukitzea!
5. Elena
Euskaltegira etorri baino lehen, Korrikan parte hartu izan dut, eta euskara ikasten hasi nintzen gero eta gogo gehiagorekin. Aurten, aukera oso berezia dela uste dut, eta ez guretzat bakarrik, Gares herriarentzat ere bai! Korrikaren hasiera eguna jai hartu dut lanean, prestaketetan lagundu ahal izateko. Gutxi falta da hasteko, eta herrian urduritasuna sumatzen hasi da. Ika, Ika, Klika Korrika!
6. Willy
Jakin genuenetik, sekretuari eustea arras zaila egin zitzaigun, baina berehala hasi ginen jo eta su prestaketetan. Hasierakoa lan handia izan da guretzat; hala ere, prestatu bitartean  oso une politak bizi izan ditugula esan dezaket. Espero dut Korrikaren hasiera bultzada handia izatea gure herriarentzat. Euskara berreskura dezagun!