Ahize-AEK 30+10 Mintegian

imh

Urriaren 23an egin zen Elgoibarren 30+10 Mintegia, Makina Erreminta Institutuak (IMH) antolatuta, besteak beste, Ahize-AEK hizkuntza-aholkularitzarekin batera. Jardunaldiaren 8. edizio honetan, Hizkuntza-kudeaketa enpresan izan zen gaia.
AEKren koordinatzaile nagusi Mertxe Mugikak hasiera ekitaldian hartu zuen parte eta Ahize-AEK zerbitzuko Mikel Urdangarinek eman zuen lehenengo hitzaldia, Lanbide Heziketa eta Euskara. Gehitu proiektuko emaitzak izenburupean. Egindako azterketaren ondorioetako bat hau izan zen: “Ikerketan parte hartu duten 10 ikasletik 8k uste dute gai direla euskaraz lan egiteko, 6k nahiko lukete hala egin, eta 4k lortu dute aurten praktikak euskaraz egitea”.
Guztira, sei hitzaldik, tailer batek eta bi mahai-inguruk osatu zuten egitaraua. Guztietan aurkeztu ziren enpresa, ikastetxe eta erakundeentzat baliagarriak izan daitezkeen zerbitzuak, baliabideak eta esperientziak.

Hitz gurutzatuen txapelketa Basaurin

 

Hitz gurutzatuen txapelketak hirugarren edizioa izango du Basaurin azaroaren 9an, Bolintxu AEK euskaltegiak eta Enrike Jaio Kultur Elkarteak antolatuta. Halere, ohi duen moduan, ez da txapelketa hutsa izango, aukera aparta baita parte-hartzaileek elkar ezagut dezaten giro alai, patxadatsu eta, batez ere, euskaldunean.
Zapatu goiz osoa izango dute horretarako, goizeko 09:30ean hasiko den lehiaketak hiru aldi izango dituelako: sailkapena, finalerdia eta finala. Sailkapen fasean aurreneko 20 postuetan geratzen direnak pasatuko dira finalerdira, eta hortik lau baino ez dira iritsiko finalera. Finalistak agerian eta jendaurrean jokatuko dute, eguerdiko hamabiak eta ordu bata bitartean. Irabazleak Luma aldizkariaren urtebeterako harpidetza eta Euskal Herriko Txapelketarako dieta txiki bat eskuratuko ditu. Eta beste finalistek, berriz, harpidetza eta opari bana. Herri eta elkarte giroko mokadu batez emango diote amaiera goizari.
Bolintxu AEK euskaltegian eman beharko dute izena parte hartu nahi dutenek, 5€ ordainduta.


Praktikatu orain, gero euskaraz bizitzeko!

praktikatu

Euskaltegietako matrikulazio kanpainarekin batera, AEK-k mintzapraktika programen kanpaina berria jarri zuen abian: Gaur, euskara praktikatu. Bihar, euskaraz bizi!. Horrenbestez, 2013-14 ikasturteko mintzapraktika egitarau asko (Berbalagun, Mintzalagun, Gurasolagun, Mintzakide...) dagoeneko martxan dira, baina oraindik ere eman dezakete izena parte hartu nahi dutenek. Euskal Herri osoan, 90etik gora dira horrelako egitasmoak, eta guztietan dago aukera ondo pasatzeko, elkar ezagutzeko eta, jakina, euskara praktikatzeko.
Dagoeneko hainbat lekutan egin dituzte aurkezpenak, esaterako, Enkarterrin, Ezkerraldean, Meatzaldean, Ermuan, Gernikan, Aiaraldean, Sakanan... Areago, batzuek egin dituzte lehen ekintzak ere: Durangaldeko berbalagunen 10. urteurren festa; Bermeon 1983ko uholdeen ostean herrian egin diren lanak eta gertatutako anekdotak ezagutzeko bisita gidatua; Portugaleten, Bilborako trenbidearen 125. urteurrenaren erakusketa ikustera joan ziren, Portugaleteko Rialia museora, euskaraz eta doan; Etxarri Aranatzen Taim eta Bremengo musikariak antzezlana... Gipuzkoan ere badago aukera  euskara giro jator eta alaian praktikatzeko, honako herri hauetan: Andoainen, Usurbilen, Zarautzen, Zumaian, Orion eta Azkoitian.
Gainera, mintzapraktika programetan parte hartzen duten guztiek, euskaraz mintzatzeaz eta gozatzeaz gain, hainbat abantaila dituzte. Argitalpenetan, adibidez,  AIZU! aldizkariaren urte osoko harpidetza (10 ale) merkeago dute (harpidetza arrunta 29€; mintzapraktika partaideentzat 23€). Berria egunkariak %50eko deskontua eskaintzen die asteburuetako harpidetzan. Eta Argia astekariari dagokionez, hilabetez (4 ale) doan jasotzeaz gain, deskontua izango dute harpidetza eginez gero (urte osokoan %25; hilean behineko harpidetza 39€). Unibertsitatean, berriz, Udako Euskal Unibertsitateak %25eko deskontua eskaintzen du ikastaroetan. Eta EHU-UPVko ikasleentzat aukera askeko kredituak daude mintzapraktika programaren batean parte hartzeagatik.

Informazio gehiago:
www.praktikatu.org