Gotzon Hermosilla
HIRUZPALAU AMETS LARRI
Tatxers
Tough Ain’t Enough, 2021
Gero eta nabariagoa da Tatxers talde nafarrari labur gelditzen zaizkiola oi! edo street punk etiketak. Dudarik gabe, horiek dira bere sustraiak, Kaosa Euskal Herrian bilduman parte hartu izanak erakusten duen moduan, baina Housemartins, Redskins, Ferrymen, Skin-Deep eta beste zenbait talderen moduan, jakin dute esparru zabalagoetara iristen, gitarra garden eta pop melodia distiratsuei esker. Tough Ain’t Enough diskoetxeak duela gutxi argitaratu dien diskoak, Hiruzpalau amets larri izeneko lau abestiko EPak, ederto frogatzen du hori. Sare sozialen bidez lehenagotik ezagutzen genituen bi abestiak, Urte kontua eta Goizean oskorri, oso ondo zeuden, eta diskoa osatzen duten beste biak ez dira atzean gelditzen. Gauzak okertzen ez badira, poz handiak emango dizkigu talde honek.
