Urtarriletik apirilera egingo dira 2025eko maskaradak. Zalgize, Mendikota, Ozaze eta Iruriko gazteek jokatuko¹ dituzte aurten. Ohi den moduan, lehen eta azken emanaldiak antolatzaileen herrietan izango dira, eta aurten lau herri direnez, modu bereziagoan eskainiko dituzte. Urtarrilaren 18an, lehen egunean, barrikadak Irurin egingo dituzte, eta emanaldi nagusia Ozazen. Azkenekoan, apirilaren 25ean, barrikadak Zalgizen izango dira, eta arratsaldeko saioa Mendikotan. Gainerako hitzorduak honako hauek izango dira: urtarrilaren 25ean, Ainharben; otsailaren 1ean, Lexantzün; 8an, Muskildin; 14an, Pagolan; 22an, Altzürükün; martxoaren 1ean, Altzai-Lakarrin; 7an, Maulen; 14an, Idauzen; 21ean, Larrainen; 28an, Alozen; apirilaren 5ean, Hokin; 12an, Gameren; eta 18an, Barkoxen.

Desobedientzia zibila oholtzan

Desobedienteak 18/98 antzezlana estreinatuko du, urtarrilean, Tanttaka Teatroa konpainiak. Baltasar Garzon epaileak Euskal Herriko hainbat eragile eta hedabideren aurka garatutako 18/98 auzia hartu du abiapuntu Maria Goiricelaya egileak desobedientzia zibilaz mintzatzeko, bai haren historiaz bai egungo gizartean duen tokiaz. Aiora Enparantzak euskaratu du lana, eta Fernando Bernuesek eta Mireia Gabilondok zuzendu dute. Enparantza bera, Iñigo Azpitarte, Klara Badiola, Kepa Errasti eta Omar Somai dira antzezleak. Urtarrilaren 8an aurkeztuko dute Bilboko Arriaga Antzokian.

AUDIOGILE BERRIAK egitasmoaren hirugarren deialdia martxan da dagoeneko. Tabakalerak eta EITBk antolatzen dute, euskarazko soinu fikzioa sustatzeko. Urtarrilaren 12ra arte aurkez daitezke lanak, eta hiru proiektu onenek laguntza jasoko dute garatzeko. Hain zuzen, 2025eko lan irabazlea, Xabin Fernandezen Zure ilunetan, jada entzungai dago EITBren Guau audio plataforman (https://guau.eus/). ULU Mediak ekoitzia², bost atalez osatuta dago.

EUSKROWD proiektuak euskal hiztunen laguntza eskatu du euskarazko ahots eta testuen corpus irekia sortu ahal izateko. EHUren proiektu partizipatiboa da Euskrowd, eta adimen artifizialak “euskara naturala” ulertzeko gai izatea du helburu. Hau da, hizkuntza teknologiak hobetzea, etorkizun hurbilean gailu digitalek euskara “bere aberastasun, euskalki³ eta adierazteko modu guztietan” uler dezaten. Horretarako, esan bezala, euskaldunen laguntza eskatu dute: aplikazioan (https://euskrowd.ehu.eus/home) sartu eta nork bere ahotsa grabatzeko eskatu diote jendeari, datu base ahalik eta osoena osatzeko.

TRAJEA komedia estreinatuko du Txalo produkzioak konpainiak urtarrilean. Saltoki handi batean gertatutako istripu baten harira, segurtasun zaindariak negozio gizon bati eginiko galdeketa du ardatz lanak. Juan Cavestanyk idatzitako antzezlana Martin Agirrek itzuli du, eta Begoña Bilbaok zuzendu. Bi protagonisten rolak Joseba Apaolazak eta Asier Hormazak jokatuko dituzte. Urnietan izango da aurrestreinaldia, urtarrilaren 7an; eta 9an, estreinaldia, Hondarribian.

NAHIERAN plataforma birformulatuta, telebista plataforma digital berria jarri du martxan EITBk: ETB On. Bertan, ETBren edukiak ikus daitezke, zuzenean eta/edo nahi den unean eta moduan. Zuzeneko emanaldiek garrantzi handia izango dutenez plataforman, EITBk horietarako guztietarako sarbidea emango du. Bestelako edukiei dagokienez, ETBren egungo zein iraganeko edukiak jasoko ditu plataformak. Bestalde, EITBren irratiak eta horien eduki guztiak Guau plataforman topatu ahal izango dira.

1. Jokatu: antzeztu, antzezpena egin.
2. Ekoitzi: produzitu.
3. Euskalki: dialecto de la lengua vasca (es), dialecte de la langue basque (fr).