Zuzendaria: Jesse Eisenberg. Gidoia: Jesse Eisenberg. Aktoreak: Jesse Eisenberg, Kieran Culkin, Will Sharpe, Jennifer Grey, Kurt Egyiawan. AEB-Polonia, 2024.

Istorioa: David eta Benji lehengusuak dira. Izaeraz oso ezberdinak, txikitan oso harreman estua zuten, baina aspaldian ez dute elkar ikusi. Amonak hil aurretik azaldutako nahia betetzeko, AEBetatik Poloniara joango dira haren jaiotetxea ikustera, Holokaustoari buruzko bidaia antolatuan. Amona judua zen, II. Mundu Gerran nazien jazarpenetik ihes egindakoa.

Sariak: Sundance jaialdian aurkeztu zuten filma iaz, eta gidoi onenaren saria jaso zuen. Ondoren, izendapen eta sari gehiago jaso ditu; batez ere, Kieran Culkin aktoreak, Benji gorpuzten duenak.

Onena: Bi lehengusuen arteko gorabeherek bidea ematen diote oinazeari buruzko gogoetari: Holokaustoko bizipen eta oroitzapen gogorren zama hain handia izanik, norberaren bizitzako bestelako minek zer-nolako garrantzia dute? Halako basakeria pairatu zutenak gogoan, egunerokoak ez al dira txikikeriak? Aldera daitezke? Sotilki eta modu arinean, baina ez arinkeriaz, landu du gaia filmak, umorez zipriztinduta. Bestalde, heriotzaren eta gertakari tragikoen inguruan garatutako turismoa ere badu hizpide, askorik garatu ez arren.

Txarrena: Gai sakonak transzendentziaren putzuan ito gabe jorratu izana eskertzekoa da, baina hausnarketarako bidean kontakizunak behartuegia dirudi, bideratuegia. Bestalde, nahiz eta zuzendariak berak aitortu duen bere asmoa ez dela Ekialde Hurbilari buruzko eztabaidak sortzea (filma prestatzen 2023ko urria baino lehen hasi zen), gaia oinazea izanik saihestezina da aktualitatearekin lotzea, egun Palestinan ikusten ari garen tragedia baitakar gogora ezinbestean.

Eñaut Mitxelena