XXI. mendearen hasieran kokatu du Miren Amurizak Pleibak eleberria (Susa). Umezarotik nerabezarorako trantsizioari eta haustura bati buruzkoa da, eta egonezin handia islatzen du, partekatua izan zen bidea bitan banatzean sortua: umezaroa elkarren ondoan igaro ostean, gaur egun Jonek eta Pollyk ez ikusiarena egiten diote elkarri kalean gurutzatzen direnean. Ahozkotasunetik oso hurbil dagoen testua sortu du idazleak: nerabe paisaia rural-poligoneroa, institutuko korridore atenporalak, morora autobusez jaitsi eta belodromora motorrez igo, Hemendik At, Chenoa, lokaleko maromoak eta txosnetako Goi Gerlariak, erantzun gabeko perdidak... Sasoi baten erretratua da kontakizuna, belaunaldi bat ordezkatzen duten erreferentzia ugarirekin eta gazteen jargoiz eraikia.

TENE MUJIKA beka irabazi dute Iñaki Sagarnak eta Lander Aranberrik, euskaldunok Israel-Palestina auziaren aurrean izan dugun bilakaera aztertzeko proiektu batekin. Euskal mugimendu abertzaleak gatazka hori nola ikusi duen, Israelgo Estatuaren sorreratik XX. mendearen azken hamarkadetara, ikertu nahi dute. Arreta berezia jarriko diote kultur munduari, hebreeraren biziberritzeak eta kibbutzen mugimenduak hala lilura nola jakin-min handiak sortu zituztelako euskaltzaleen artean.

SEGUNDO ERABAKIGARRIAK
Manu López Gaseni
Elkar, 2024

Karim institutuaren ondoko terraza batean dagoela, bonba motxila baten leherketaren lekuko da. Atentatuaren egileen ondoan egon arren, onik atera da. Ertzaintzak polizia etxera eraman du galdeketa egiteko, eta handik gutxira emakume misteriotsu bat agertu da Karimi eskaintza berezi bat egiteko: hiriko magrebtar komunitatean atentatuaren errudunak aurkitzen laguntzea. Zeren truke, ordea?

FUN HOME
Alison Bechdel
Itzulpena: Danele Sarriugarte
Txalaparta, 2024

Alison Bechdelek aitarekin izandako harreman zaila umorez kontatzen du memoria grafiko honetan. Bruce Bechdel pertsona zorrotza zen, ingeles irakaslea eta herriko ehorztetxeko zuzendaria. Alisonek lesbiana zela esan ostean jakin zuen aita gaya zela. Handik gutxira hil zen gizona, eta misterio bat utzi zion alabari oinordekotzan.