VI. Forum Subiranistaren Eskola egin zen Gironan joan den abenduan, eta Ane Elordi Alburquerque Korrikako arduradunak bertan hartu zuen parte. Ekitaldiak Europako hizkuntz eskubideak izan zituen hizpide; hala, inperialismo linguistikoaren aurkako borrokaz, herri mobilizazioaz, hiztun berrien parte hartzeaz eta teknologia berrien rolaz mintzatu ziren partaideak. Elordik euskara egoera larrian dagoela azaldu zuen bere hitzaldian: “Gure hizkuntzaren erabilera atzeraldia izaten ari da, non eta euskara gehien baliatzen den guneetan. Orotara, hiztunen % 17,5ek soilik erabiltzen dute gaztelania bezainbeste edo gehiago”. Halaber, euskararen kontrako oldarraldi judizialak esparru politikoa eta mediatikoa barne hartzen dituela adierazi zuen, eta horrek diskurtso aldrebesak (euskararen aldeko neurriak diskriminazioarekin lotzen dituztenak) sorrarazten eta areagotzen dituela. Horregatik guztiagatik Korrika eta antzeko ekimenak ezinbestekoak direla ondorioztatu zuen Elordik.