Simon Stephens antzerkigile ospetsuaren Heisenberg antzezlana estreinatuko du Tanttaka Teatroak, abenduaren 3an, Bilboko Arriaga Antzokian. Werner Heisenberg fisikari alemanak 1972an formulatutako Ziurgabetasunaren printzipioa oinarri hartuta, gizakion arteko konexioa zein ziurgabea eta komikoa den erakutsi nahi du egileak. Horretarako, ia antagonikoak diren bi pertsonaiaren ezusteko topaketa kontatzen du: Georgie Burns 42 urteko emakumeak eta Alex Priest 75 urteko gizonak Londresko Saint Pancras geltokian ezagutuko dute elkar, eta, hortik aurrera, bien bizitza aldatu egingo da. Fernando Bernuesen zuzendaritzapean, Ramon Agirre eta Naiara Arnedo aktoreek gorpuztuko dituzte bi protagonistak. Bilboko estreinaldiaren ostean, hainbat emanaldi eskainiko dituzte datorren urtean: urtarrilaren 1ean, Getxon; otsailaren 20tik 23ra, Donostian; martxoaren 7an, Beasainen; 9an, Eibarren; 29an, Gernikan...
Mendiarekin hitzordua Bilbon
Abenduaren 6tik 15era egingo da 17. BBK Mendi Film Bilbao Bizkaia jaialdia eta, ohi bezala, mendiari, abenturari, naturari eta muturreko kirolei buruzko lanei egingo die leku Bizkaiko hiriburuko hainbat tokitan. Aurten, guztira, nazioarteko 49 pelikula eskainiko dira, tartean Euskal Herrian ekoitzi diren edo zuzendari euskaldunak dituzten 11 lan, besteren artean: Mikel Lizarralderen Zazpi, Janire Etxaberen Haize lerroak, Ander Salsamendi eta Aitor Intxaurragaren Hiru Haundiak. Taupadak eta gailurrak. Sail Ofizialean, 40 film izango dira lehian, eta Zabalandi sailean, lehiatik at, 9 lan aurkeztuko dira. Film emanaldiez gain, beste jarduera ugari eskainiko ditu Mendi Filmek: erakusketak, hitzaldi eta solasaldiak, baita umeei beren-beregi eskainitako Gau Magikoa ere, non ipuinak, antzerkia, musika eta proiekzioak uztartuko diren. Emanaldietarako sarrerak eta egitarau osoa mendifilmfestival.com atarian eskura daitezke.
APPAMAURIZIA proiektuak eskuratu du Loraldia jaialdiaren 3. Sormen Digitala beka eta, horrenbestez, 10.000 euro jasoko ditu egitasmoa garatzeko. Teknologia aurreratuen bidez, publikoari euskal tradizioak hurbiltzea du xede AppaMauriziak, errealitate birtuala erabiliz. #Mauriziakezdauinorhil kolektiboak sortutako proiektua da, eta Lorea Argarate Zubia eta Ines Osinaga ditu gidari. 2026ko Loraldian aurkeztuko dute egitasmoa.
ABENDUA itxura berriarekin hasi du Korrika aplikazioak. Gainera, diseinua berritzearekin batera, aplikazioaren erabiltzaileak saritzen hasiko da. Horretarako, hilero zenbait zozketa egingo ditu erabiltzen dutenen artean: Esne Beltzaren azken kontzerturako sarrerak, liburuak, Korrika materiala, AIZU!ren harpidetzak... Parte hartzeko, aplikazioa deskargatu behar da (doan, Google Play-n edo App Store-n). Irabazleen izenak aplikazioan bertan jakinaraziko dira, Korrikak sortzen dituen albiste guztien antzera.
DONOSTIAKO AmaHiru taldearen Igogailu batean amaitu zen mundua komedia “klaustrofobikoak” irabazi du 2025eko Poltsiko Antzerki Sorkuntza lehiaketa, Donostia Kulturak EHAZErekin eta Donostiako Udaleko euskara zerbitzuarekin lankidetzan antolatzen duen programa. Bigarren saria Baionako Itzuli taldearen Adriene Bergson-Johnson / Euskal kulturak iraultza behar du! lanak jaso du. Bi saridunek beren antzezlana ekoizteko dirua jasoko dute, eta hurrengo Poltsiko Antzerki Jaialdian estreinatu ahal izango dute.
SÜ AZIA elkartearen eta Euskaltzaindiaren arteko hitzarmenari esker, Junes Cazenave-Harigile apaiz eta idazlearen Français-Eüskara Hiztegia sarean erabilgarri dago. Zubererazko hiztegia da, frantsesezko hitzak zuberotarrez ematen dituena, eta 28.000 berba baino gehiago biltzen ditu. Jatorrizko lana, 1990ekoa, 2023an berrargitaratu zen aipatu hitzarmenari esker. Orain, paperean plazaratutakoa sarean ere kontsulta daiteke, Euskaltzaindiaren webguneko (www.euskaltzaindia.eus) Hizkuntza baliabideak atalean.
ABENDUAREN 31n amaituko da Café Bar Bilbao-Tartean Teatroa Antzerki Laburreko Gidoien Sarietarako lanak aurkezteko epea. Aurtengoa 22. edizioa izango da eta, euskarazko eta gaztelaniazko testuak saritzeaz gain, nobebade bat dakar: EITB Sari Berezia euskarazko soinu fikziozko gidoi labur onenari. Hori irabazten duen lanak 1.000 euro jasoko ditu eta EITBPodkast plataformarako grabatuko dute. Sariketaren araudia Café Bar Bilbaoren webgunean dago eskuragai: www.bilbao-cafebar.com.
