Zabalik da ArteDrama Euskal Laborategian izena emateko epea

Apirilaren 6tik 11ra egingo da Aulestin (Bizkaia) arte eszenikoetan euskaraz aritzen diren aktore, zuzendari, antzerkigile zein antzerkizaleen urteroko topagunea¹. Euskal Herriko arte eszenikoetan murgilduta² dabiltzan lagunen arteko eztabaidak, jakintza eta elkartrukeak sustatzeko asmoa du bilkurak. Horretarako, hainbat irakasleren tailerrak prestatu dituzte: Maryse Urruty, Nagore Tamayo, Idoia Tapia, Ximun Fuchs, Formol Laborategia-ko Intza, Alkain, Edurne Azkarate eta Mikel Ibarguren, eta Ander Lipus. Astelehenetik larunbatera, 48 orduz guztira, euskara hutsean. Izena www.artedrama.com atarian eman daiteke, eta azkar ibiltzeko gomendioa egin dute, 16 leku besterik ez dutelako.

Hala, Maryse Urrutyk Alter Egoa tailerra proposatu du: nor naiz agertokira igaten³ naizenean? Kalean ikusten ahal duzun hura? Intimitatean ezagut dezakezuna? Edo beste ni bat? Esplorazio hori eginez, pertsonaren, aktorearen eta pertsonaiaren arteko desberdintasunak bilatuko dituzte.

Nagore Tamayok, berriz, Gorputza adi, era eta bide tailerra prestatu du, dantzaren bitartez, partaide bakoitza bere gorputzarekiko kontziente eta aukeren jabe izateko asmoz, jolas eta hainbat dinamika fisikoren bitartez.

Idoia Tapiak, bestalde, Ahotsa motore tailerrean, ahotsa ipiniko du erdigunean⁴. Izan ere, tresna bitxia da, norberarena, besterenezina⁵: zer aukera ematen dizkit nire ahotsak sormena aktibatzeko? Zer aukera ematen didate besteen ahotsek? Zer du ahotsak kontatzeko?

Ximun Fuchs galdera batetik abiatuko da Bizia bere oholtzan tailerrean: “Antzerkiak biziraungo du? Bai… merkatuak irensten ez badu”. Haren aburuz⁶, “bizitza bera astintzeko prest dagoen aktorea beharko da, munduaren konplexutasuna aurpegian eta dantza-mugimenduetan haragituko⁷ duena, adierazteko⁸ gai izango dena. Gatazkak⁹, emozioak eta erronkak argitara ekarriko dituen antzerkilaria”.

Formol Laborategia Irudi eta dispositibo eszenikoen eraikuntza-z ariko da, partaideak espazio eszenikoaren esperimentazioan murgil daitezen: nola jarri harremanetan espazioarekin hura eszenara ekartzeko? Poemak izango dira dispositibo eszenikoaren helduleku¹⁰ eta irudi eszenikoen eraikuntzan trebatzeko¹¹ aitzakia.

Azkenik, Ander Lipusek Basa tailerrean hainbat gai jarriko ditu mahai gainean: Antzerkia eta erritoa, Herria eta komunitatea, Aktorea eta krudelkeria, Egin jokoa, egin jolasa; izan punki, izan basa...

1. Topagune: punto de encuentro (es), lieu de rencontre (fr).
2. Murgildu: sumergir(se) (es), (s')immerger (fr).
3. Igan: subir (es), monter (fr).
4. Erdigune: centro (es), centre (fr).
5. Besterenezin: inalienable (es), inaliénable (fr).
6. Aburuz: ustez, iritziz, ustetan.
7. Haragitu: materializar(se) (es), s'incarner (fr).
8. Adierazi: expresar (es), exprimer (fr).
9. Gatazka: conflicto (es), conflit (fr).
10. Helduleku: asidero (es), appui (fr).
11. Trebatu: entrenar(se) (es), (s')entraîner (fr).