AEK, Justizia Sozialaren Mundu Eguneko agerraldian

Joan den ostiralean, otsailaren 20an, AEKk Justizia Sozialaren Mundu Egunaren harira¹ Gasteizko Izaskun Arrue Zentroan antolatu zen agerraldian parte hartu zuen. Hainbat eragile bertaratu ziren 2026ko Justizia Sozialaren Mundu Eguneko adierazpena² aurkezteko, tartean AEKko ordezkariak: Nazio Kontseiluko kide Aize Otaño eta Gasteizko AEKko Josu Ramos, Ane Aristi eta Maddalen Zugasti kideak.

Adierazpena kezka eragiten duen testuingurua³ azaltzen hasten da: “Gaur egun bizi dugun bidegurutze politiko eta ideologikoan, eskuin muturrak eta ideologia kontserbadoreek gero eta itoago dute justizia sozialaren kontzeptua. Politika neoliberal globalek kolonizazio-historia sakon batean dute oinarria, eta arrazismoa, estaturik gabeko nazio-identitateen eta hizkuntza gutxiagotuen zapalkuntza, klasismoa, sexismoa, LGTBIQ+fobia, kapazitismoa eta, oro har, mota guztietako intolerantziak betikotzen⁴ dituzte, betiere ideologia fundamentalista modernoek, elite ekonomikoaren esku dauden teknologia berriek eta diskriminazio-forma berriek hauspotuta⁵”.

Horri guztiari aurre egiteko, agerraldian bildutako eragileek proposatu zuten “euskal herritar guztiok botere ekonomiko globalen eta tokikoen aurrean ahots kolektibo eta antolatua osatzea”. Bestalde, hizkuntza minorizatuen zapalketa ere aipatutako aferen⁶ artean egon zen, eta “arazo transbertsal hau erdigunean kokatzea” eskatu zen.

Adierazpena hogei eragilek baino gehiagok izenpetu dute.

1. -(r)en harira: a propósito de (es), à propos de (fr).
2. Adierazpen: deklarazio.
3. Testuinguru: contexto (es), contexte (fr).
4. Betikotu: eternizar(se) (es), (s')éterniser (fr).
5. Hauspotu: bultzatu, sustatu.
6. Afera: arazo, gatazka.