Euskal Herriko Mus Txapelketa abian da

Martxora bitartean, ehunka bikote¹ mus jokoan ariko dira Euskal Herriko hainbat herritan. Izan ere, azarotik martxan da Euskal Herriko XVII. Mus Txapelketa. Otsailaren 22ra arte, lehen fasea jokatuko da herriz herri. Martxoaren 7an, berriz, zazpi lurraldeetako finalak izango dira: Arabakoa, Kanpezun; Bizkaikoa, Lezaman; Gipuzkoakoa, Antzuolan; Lapurdikoa, Urruñan; Nafarroakoa, Iruñean; Nafarroa Beherekoa, Isturitzen; eta Zuberoakoa, Urdiñarben. Azkenik, Euskal Herriko finala Amasa-Villabonan jokatuko dute, martxoaren 28an, Euskal Herri osoko 128 mus bikote onenek. Egun horretan, jaiari ere tartea egingo zaio, txapelketaz gain bestelako ekintzak antolatuko baitituzte. Euskal Herriko Mus Federazioak antolatuta, txapelketak arrakasta handia izaten du. Euskal Herri osoko 200 herritan baino gehiagotan jokatzen da, eta urtetik urtera gero eta parte hartzaile gehiago izaten ditu. 2009an, lehenengo aldiz antolatu zutenean, 1.120 bikotek hartu zuten parte; iaz, berriz, 2.515 bikotek. Txapelketari buruzko nondik norako guztiak https://www.ehmus.eus atarian² ezagut daitezke. Joan den urtean, Leitzako Jose Manuel Zabaletak eta Jose Miguel Gonzalezek irabazi zuten txapelketa. Nork beteko ote du aurten haien lekua?

1. Bikote: pareja (es), couple (fr).
2. Atari: webgune, web-orri.