AEKk Aureli Argemí hizkuntza-eskubideen saria jaso du

Aureli Argemí hizkuntza-eskubideen saria ematen du Gutxiengo Etniko eta Nazioentzako Escarré Nazioarteko Zentroak (CIEMEN), hizkuntza gutxituen¹ eta hizkuntza-aniztasunaren² defentsa aitortzeko³. Aurten, AEKri ematea erabaki du, euskalduntze-lana egiteagatik eta Korrikaren bultzatzailea izateagatik. Sari-banaketa Bartzelonako Ateneoan egin zen otsailaren 6an. Lurdes Etxezarreta Artabe eta Maialen Begiristain Grado AEKko Nazio Kontseiluko kideek jaso zuten AEKren izenean. Haiek adierazi⁴ zutenez, "Euskal Herriaz harago, munduko hizkuntza gutxituen hiztun guztiak eroso eta libre bizi ahal izatea nahi genuke beren hizkuntza ardatz⁵ nagusi duen komunitatean". Era berean, azpimarratu⁶ zuten sariak “ez duela erakunde baten lana bakarrik aitortzen, hizkuntza-eskubideen aldeko borroka kolektiboa baizik”. Halaber, AEKko ordezkariek nabarmendu zuten “Euskal Herriko herritar guztiek euskara ikasteko eskubidea eta erantzukizun⁷ komunitarioa” dutela, eta eta “euskararen ardatz den komunitatean eroso eta libre bizitzeko” nahia adierazi dutela.

CIEMENek beste bi kategoriatan ere banatzen ditu sariak: aurten Elkartasunari Saria (pobreziaren eta desberdinkerien aurkako borrokan nabarmendu diren pertsonak edo erakundeak aitortzeko) Sousan Tayseer Abdel Salam ekintzaile palestinarrak jaso du; eta Herrien Eskubideen Aldeko Saria (herri eta nazio gutxituen eskubide kolektiboen aldeko lana aitortzeko) ACAPS ( Asociación Catalana de Amistad con el Pueblo Saharaui) elkarteari eman diote.

1. Gutxitu: minorizado, -a (es), minorisé, -e (fr).
2. Aniztasun: diversidad (es), diversité (fr).
3. Aitortu: reconocer (es), reconnaître (fr).
4. Adierazi: esan, baieztatu.
5. Ardatz: eje (es), point essentiel (fr).
6. Azpimarratu: subrayar (es), souligner (fr).
7. Erantzukizun: responsabilidad (es), responsabilité (fr).