FLY SHIT ETA BROT BORD
Fly Shit
Kasba Music, 2023

Txoko honetan, behin baino gehiagotan goraipatu izan ditugu Fly Shit Bergarako taldearen dohainak. Ia hiru hamarkada eman ditu hardcorearen esparruan bide berriak irekitzen, eta disko bikainak atera ditu, baina apaltasuna, Zuk zeuk egizu filosofia eta elkartasunerako gogoa inoiz galdu gabe. Azken lana Brot Bord talde katalanarekin elkarbanatutako diskoa da. Bergararren bost abestiak itzelak dira, Elkarrekin egin dezagun ederrarekin hasita eta Fugaziren Merchandise kantu ezagunaren bertsioarekin amaituta, eta ongi erakusten dute taldeak nolako maila lortu duen urte hauetan guztietan. Musika alde batera utzita, gauzak egiteko modu baten erakusgarri ere bada disko hau. Beste aldean, Brot Bord taldearen bost abesti daude, katalanez.