Neomak taldeak 'Lazturak Orbain' kaleratu du

Kanpo eta barne beldurrez dihardu¹ taldearen bigarren diskoak. Bederatzi abestietako bakoitza beldurrei begiratzeko modu bat da: “Aldatuz goazela, desberdin kudeatzen² ditugu gure beldurrak. Oraingoan, orbainak³ ezkutatu beharrean, erakutsi egin ditugu, aldaketa agerian uzteko; indargune direla azpimarratu, ez ahultasun. Hausturak⁴ eta konponketak historiaren parte baitira”. Lau emakume dira taldearen ardatza, baina Etxahun Urkizu eta Eider Villalba izango dituzte lagun zuzenekoetan: Atarrabia (abenduak 27), Gasteiz (urtarrilak 3), Bilbo (urtarrilak 6), Mungia (urtarrilak 16), Donibane Lohizune (otsailak 14)...

HEMEN BEHARKO LUKE
Txuma Murugarren
Gaztelupeko Hotsak, 2025

Zazpi abesti bildu ditu Murugarrenek etxean eta etxekoekin grabatutako aldarrikapen⁵ honetan. Bizitza azken tantaraino bizi, gozatu eta pairatzeko⁶ gonbita da, ameskeriak alboratuta eta denbora alferrik galdu gabe. Musikari gipuzkoarraren hamabigarren lana da bere bakarkako musika ibilbidean. Erritmo elektronikoetan oinarritutako pop ederra, hitz zorrotz, malgu eta, batzuetan, sutsuak erabili ditu.

VENTA AUNDI
Monsieur leCrêpe
Egilea editore, 2025

Lau abestik eta bi skit-ek osatzen dute 19 minutuko EP hau. Rapa da hasi eta buka, presarik gabe egina eta su txikitan egosia (oraingo honetan, errepika eta guzti). Gehienbat euskaraz, leCrêpe jaunaren (Juantxo Arakama) hainbat aldaera azaleratzen⁷ ditu lanak, eta 12”-ko binilo formatuan jarri da salgai. Musikari gipuzkoarrak MLC abestia eta horren a capella bertsioa ere sartu ditu B aldean.

1. Dihardu: hitz egiten du, mintzatzen da.
2. Kudeatu: gestionar (es), gérer (fr).
3. Orbain: cicatriz (es), cicatrice (fr).
4. Haustura: ruptura (es), rupture (fr).
5. Aldarrikapen: erreibindikazio, eskakizun.
6. Pairatu: sufritu, jasan, nozitu.
7. Azaleratu: emerger (es), émerger (fr).