Ahotsa eta kordak besterik ez

Ahotsa eta kordak zuzeneko proiektua ondu¹ dute Eñaut Elorrietak eta Alos Quartet-ek. Bestelako artifiziorik gabe ariko dira agertokian, lehenengo aldiz, askotan kolaboratu arren elkarren diskoetan. Emanaldiak Elorrietaren ibilbide osoa izango du ardatz², haren garai guztietako kantuekin osatuko baita ikuskizuna, Ken Zazpi taldetik hasita. Baina Alos Quarteten hainbat abesti esanguratsu³ ere bilduko ditu proiektuak, denak ere modu zaindu eta soilean⁴. Kontzertu bakan⁵ batzuk eskainiko dituzte: urtarrilaren 3an, Tolosan; 10ean, Gasteizen; 23an, Zornotzan; otsailaren 7an, Donibane Lohizunen; martxoan, berriz, 11n Bilbon eta 20an Iruñean.

 URTZEN
Urtz
Egilea editore

Taldearen hamabost abesti ikoniko biltzen ditu CD bikoitz honek. Formatu akustikoan birgrabatu dituzte, eta doinu berritu, intimo, hunkigarri⁶ eta sinfonikoz zipriztindu⁷ dituzte. Horiez gain, kanta berri bat ere sartu dute. Bira antzokietan egingo dute: Lekeition, urtarrilaren 23an; otsailaren 7an eta 28an, Bilbon eta Iruñean, hurrenez hurren; Gasteizen, martxoaren 5ean; eta Donostian, apirilaren 17an.

BERRERAIKITZE AROA
Heitxi
Baga-Biga, 2025

Erromeria, lehiaketa eta haur ikuskizunetan ibili ostean, bakarkako lehen lana kaleratzeko erronkari⁸ ekin dio Heitxik, proiektu oso pertsonalarekin: nortasuna berreraikitzeko prozesua aztertu, benetakotasunaren⁹ aldeko borrokaz eta bizitza osoan aurre egin beharreko oztopoez gogoeta¹⁰ eginez. Musikalki, elektronika eta euskal soinu tradizionalak nahasi ditu, trikitia eta panderoa, kasu¹¹.

1. Ondu: sortu, egin.
2. Ardatz: eje (es), point essentiel (es).
3. Esanguratsu: significativo, -a (es), significatif, -ive (fr).
4. Soil: apaingarririk gabe, puru.
5. Bakan: gutxi, urri.
6. Hunkigarri: conmovedor, -a (es), émouvant, -e (fr).
7. Zipriztindu: salpicar (es), éclabousser (fr).
8. Erronka: desafío (es), défi (fr).
9. Benetakotasun: egiazkotasun.
10. Gogoeta: reflexión (es), réflexion (fr).
11. Kasu: adibidez.