Goiatz Labandibar
Badira urte batzuk Leioako Komunikazio Zientzien Fakultatera joan ez naizela. Aldatuta omen dago erabat, kanpotik. Ez omen nuke ezagutuko EHUko campusa. Espero dut barrutik ere halaxe egotea. Alegia, eduki aldetik.
Kazetaritza ikastea Trivial jokoan gaztatxoak irabazteko trebatzea1 da, nolabait (edo hala zen, bederen. Bide batez, maite dut Trivialean aritzea; akaso, Kazetaritza ikasi nuelako. Nork ez du maite irabaztea, ezta?). Inork galdetuko balit ea zer gogoratzen dudan unibertsitateko irakasgaietan ikasi edo azaldutako edukiei buruz, gauza solte batzuk aipatuko nituzke.
Horietako bat tituluekin lotuta dago. Euskaraz baino gaztelaniaz hobeto moldatzen zen irakasle batek tituluak ongi egitearen garrantziaz hitz egin zigun. Adibide bat jarri zuen horretarako, espainieraz. Hitzez hitz gogoratzen dut adibiderako erabili zuen esaldia: “La perra de Esther Cañadas se pasea por la pasarela”. Hori irakurrita, irakurleari ez zitzaion oso argi geratzen nor zen txakurra: Cañadas top modeloaren animaliatxoa edo Cañadas bera, kazetariak iraindua.
Orain, onartzen dut, obsesio txikia dut tituluekin. Gustatu egiten zaizkit. Irakurtzen ditut eta pentsatzen dut: bai ona, edo bai graziosoa. Baina clickbait delakoaren garaian bizi garen honetan, maiz2 haserretu ere egiten naute, asko ez direlako Kazetaritza, baizik eta definitzen ere ez dakidan auskalo zer.
Kultura oso bat sortu da tituluen inguruan. Askotan, erakargarria den batek ergelkerietara3 garamatzanez, notizia ere ez diren txorakerietara, irakurle askok ez irakurtzea erabakitzen dute, edo hurrengoa entzutea. Eta norberak ondorioztatzen ditu barrukoak. Hortik eraikitzen ditugu iritziak eta mundu ikuskerak.
Egiaz, erdi egiaz, erdi gezurrez eta gezur hutsez nahasitako koktela bihurtzen ari zaigu tituluen mundua, eta, hark kutsatuta, iritzi publikoa ere bai.
Gogoratu Trivialeko gaztatxoak irabazteko egia ezagutu behar duzula. Eta, horretarako, tituluen atzean dagoena ezagutu behar da.
1. Trebatu: prestatu, entrenatu.
2. Maiz: sarritan, askotan.
3. Ergelkeria: estupidez (es), sottise (fr).
