Father Mother Sister Brother

Zuzendaria: Jim Jarmusch. Gidoia: Jim Jarmusch. Aktoreak: Tom Waits, Adam Driver, Mayim Bialik, Charlotte Rampling, Cate Blanchett, Indya Moore. AEB, 2025.

Istorioa: Hiru ataletan banatuta dago filma eta, desberdinak izan arren, hirurek familiarteko harremanak dituzte oinarri. Lehen istorioa AEBetan gertatzen da; bigarrena, Dublinen; eta hirugarrena, Parisen.
Onena: Familiarteko harreman konplexuak, inkomunikazioa... ezer gertatzen ez dela dirudien bitartean, familiaren barneko kontuak aletzen ditu Jarmuschek soil¹ eta sotilki², modu minimalista eta lakonikoan, isiltasuna trebetasunez baliatuz, ironia neurtuz, patxadaz³. Esaten ez denak azaltzen dizkigu azaldu beharrekoak, eta jorratzen⁴ dituen gaiak unibertsalak direla erakusten dio ikusleari, keinu jolastiak⁵ eginez.
Txarrena: Ezer gertatzen ez dela dirudien horretan, ikusleren bat edo beste aspertzeko arriskua, batez ere Jarmuschen lana ezagutzen ez badu.

Eñaut Mitxelena

1. Soil: sinple, apaindurarik gabe.
2. Sotilki: sutilmente (es), subtilement (fr).
3. Patxadaz: lasaitasunez, presarik gabe.
4. Jorratu: tratar (es), traiter (fr).
5. Jolasti: juguetón, -ona (es), joueur, -euse (fr).