Haurrentzako edukiak, ETB1 On katean

Martxoko AIZU!n azaldu genuenez, ETBren kateen egokitzapenak hautsak harrotu zituen. Izan ere, EITB unibertso digitalera moldatzeko bidean, ETB1 On eta ETB2 On abiatu zituen ETB3 eta ETB4 kateen ordez, hurrenez hurren¹, eta aldaketarekin batera eskaintza ere egokitu zuen, ETB3n haurrentzako euskarazko edukia emateari utzita. Horrek eragile askoren kexa ekarri zuen, baita sinadura-bilketa ere ETB3 ez ixteko eskatzeko. Besteak beste, Kontseiluak eta Pantailak Euskaraz taldeak egin zuten eskaera. Eragile horiekin bildu ostean, EITB berriro hasi da haurrentzako euskarazko edukiak eskaintzen, ETB1 On katean. Zehazki, Makusi plataformako edukiak eskaintzen hasi zen apirilaren 13an, 07:00etatik 19:00etara, LTDn edo telebista konbentzionalean. YouTuben, plataformetan eta telebista-zerbitzuen hornitzaileetan ere eskaintzen ditu.

Leioako Umore Azokan, herria agertoki

Maiatzaren 14tik 17ra egingo da XXVI. Umore Azoka, Leioako Kale Artisten Azoka, eta herriko kale eta txokoak antzeztoki bihurtuko dira, beti bezala. Aurtengo edizioan, 45 konpainiaren lanak eskainiko dira; horietatik 18 Euskal Herrikoak dira, eta gainerakoak kanpotik etorriak, batez ere Espainiatik, baina baita Katalunia, Italia, Frantzia eta Argentinatik ere. Obretako 25 estreinaldi absolutuak izango dira, eta antolatzaileek bereziki azpimarratu dute aurtengo programazioaren aniztasun² artistikoa.

GURE ZIRKUAK apirilean hasi zuen denboraldi berria. Beraz³, jendeak jada ikusi ahal ditu zirku ibiltari⁴ euskaldunaren emanaldiak. Lehen geldialdia⁵ Olaberrian izan zuen, apirilaren 25ean, eta maiatzaren 9ra arte egongo da han. Gero, Oñatin egongo da maiatzaren 15etik 31ra. Bi herri horiek dira, oraingoz, iragarri⁶ dituzten bakarrak. Sarrerak https://www.gurezirkua.eus webgunean daude salgai⁷.

32. FANT Bilboko Zinemaldi Fantastikoa maiatzaren 8tik 16ra egingo da. Sail Ofizialean, 19 film luze eta 29 labur eskainiko dituzte eta, horien artean, FANT Laburrean – Euskal Filmak ataleko⁸ 10 euskal film labur. Gainera, jaialdiak hiru profesional sarituko ditu aurten: Eugenio Mira zuzendari, musikari eta idazlea; Arantzazu Calleja konpositorea; eta Bruno Martin zuzendari, gidoilari eta aktorea. Egitarauaren xehetasun⁹ guztiak https://fantbilbao.eus/eu webgunean kontsulta daitezke.

ALBAOLAK, Euskal Itsas Museoak eta UZEIk San Juan baleontziaren lexikoa izeneko hiztegia sortu dute, ontzigintzarekin¹⁰ eta nabigazioarekin lotutako lexikoa berreskuratu eta zabaltzeko asmoz. Oraingoz, San Juan baleontziarekin lotutako terminologia jaso dute: ontzien atalak, piezak... Definizioez gain, hitzek lau hizkuntzatan dute ordaina¹¹ (euskara, gaztelania, frantsesa eta ingelesa), eta, zenbait kasutan, elementu grafikoak ere bai. UZEIren webgunean (https://uzei.eus/) dago eskuragarri, eta etorkizunean hiztegia aberasten jarraituko dute.

ANTZERKIA eta esketxak uztartuta, umore onari eta algarei lekua eskainiko die Barrexerka taldeak Patatekin antzezlan berrian. Kinto-bazkari baten ostean, tardeo betean¹², nostalgiak harrapatuko du 54 urteko protagonista. Abiapuntu horrekin, “garai zaharrak zein berriak” bisitatuko ditu obrak, egoera ezagunak nahiz absurdoak agertuta. Maiatzaren 8an eta 9an eskainiko dute, estreinakoz, Donostian. Amaia Iraundegi, Garazi Mitxelena, Nerea Aranburu, Graxi Arregi, Amaia Rojo, Mikel Irazusta, Ekain Arrieta eta Maialen Sorzabalbere izango dira oholtza gainean.

1. Hurrenez hurren: ordena horretan, hurrenkera horretan.
2. Aniztasun: diversidad (es), diversité (fr).
3. Beraz: por tanto (es), donc (fr).
4. Ibiltari: ambulante (es), ambulant, -e (fr).
5. Geldialdi: parada (es), arrêt (fr).
6. Iragarri: anunciar (es), annoncer (fr).
7. Salgai: en venta (es), en vente (fr).
8. Atal: sección (es), section (fr).
9. Xehetasun: pormenor (es), précision (fr).
10. Ontzigintza: construcción naval (es), construction navale (fr).
11. Ordain: equivalente (es), équivalence (fr).
12. Betean: en pleno, -a (es), en plein (fr).