Romain Roquefère
Hossegor, Landak, 1974
Landetan bizi da Roquefère. Duela 7 urte sartu zen euskara bere bizitzan, Hego Euskal Herrian lanean hasi zenean. Orduan erabaki zuen, “azkar asko”, bere lagun eta lankide Bixenterekin euskara ikasten hastea. Ordutik, “abentura honetan murgilduta segitzen dut”. Ruben Cordon.
Nolatan iritsi zinen euskarara?
2017ko egun batean, Bixentek eta biok bezero baten enpresa bisitatu genuen Gernikan, adimen artifizialaren inguruko proiektu bat egiteko. Mondragon Kooperatibako enpresa zen, Hegoaldeko gure lehen bezeroa. Bezeroak euskaldunak ziren, baina ez genuenez euskara ezagutzen, ingelesez komunikatzen ginen gure artean. Bidartera autoz itzultzen ari ginenean, Euskal Herrian ingelesa erabiltzea ez dela oso normala pentsatzen hasi ginen. Orduan deliberatu genuen euskara ikastea.
Horregatik erabaki zenuen ikastea orduan...
Gure enpresa, HUPI, Euskal Herrian dago; negozioa ere bertan errotua da. 2014an sortu zen Bidarten, eta 2018an bigarren bulegoa ireki genuen, Donostian. Euskaraz komunikatzea ezinbestekoa iruditzen zitzaigun.
Nolako prozesua izan duzu?
2018an, lehen aldiz, AEKrekin euskara eskolak antolatu genituen gure 12 lankideentzat. HUPIn beharrezkotzat jo genuen euskara ikastea. Hala, ostegunero, AEKko irakasleak enpresara etortzen ziren. Orain, B2 mailan ari naiz eta, heldu den urtean, ziurtagiria lortzen saiatuko naiz.
Erabiltzen al duzu?
Enpresan, gure artean, beti saiatzen gara euskaraz hitz egiten eta idazten, baina, batez ere, gure bezeroekin. Harritua naiz ikusteaz zeinen onberak diren gure bezero euskaldunak, haien aurrean euskaraz aritzen garen bakoitzean. Beti erakusten dute pazientzia eta esker ona.
Zer izan da zailena zuretzat, eta zer errazena?
Hegoaldeko euskaldunek Iparraldekoek baino azkarrago hitz egiten dute, eta, batzuetan, zaila da elkarrizketa jarraitzea. Gainera, hitz batzuk desberdinak dira mugaren alde batean eta bestean, baina ohitzen hasiak gara.
Gustuko hitza edo esamoldea:
Jai alai. Nola bizi nahiko nukeen sinbolizatzen du. Oso azkar bizi gara eta, askotan, gure plazerak ahaztu egiten ditugu. Gainera, pilotaria naizenez, Jai Alain zesta puntan jokatzea gauza handia da niretzat.
Trikimailuren bat?
ETSren kantuak erabiltzen ditut hitzak oroitzeko eta eraikuntza gramatikalak ulertzeko. ETS gehien gustatzen zaidan taldea da, haren kantuak buruz dakizkit. Nire plazeraren parte da, baita nire ikasprozesuaren oinarrietako bat ere.
