Amaia Quesada
Granada, Espainia, 1984
2010ean etorri zen Euskal Herrira. Lau urte egin zituen Santurtzin, eta hango AEKn euskaldundu zen. Ondoren, Arratiara joan zen bizitzera, Areatzara, hain zuzen ere. Han eskuratu zuen C1 egiaztagiria, baina ordurako “euskalduna nintzen”. Lanbide Heziketan irakasle, eskolak ere euskaraz ematen ditu. Eñaut Mitxelena.
Nolatan iritsi zinen euskarara? Granadatik Santurtzira joan nintzen, lanagatik. Mamarigako kultur etxean, Santurtziko gaztetxean... nire inguruko jendea euskalduna zen. Umeekin lan egin izan dut beti, eta ikasi egin behar nuela pentsatu nuen. Batetik, nire lagunek euskaraz egiteko, haiekin nengoenean gaztelaniaz hasten zirelako. Bestetik, aurrera begira, lan egiteko.
Zergatik erabaki zenuen ikastea? Euskal Herrian bizi nahi nuelako eta, horretarako, euskara ikastea funtsezkoa zelako niretzat.
Nolako prozesua izan duzu? Oso polita. AEKren Xaribari euskaltegian eman nuen izena, Portugaleten, eta oso-oso gustura ibili nintzen. Azkenean, euskara ikasteaz gain, Euskal Herria ere ezagutu nuen: euskal dantzak, mitologia, bertsolaritza... Motibazioa apartekoa izanik, poz-pozik joaten nintzen eskoletara. Ikastaro arrunt batekin hasi nintzen, baina bigarren urtean trinkoak egin nituen. Langabezian geratu nintzenez, denbora euskara ikasteko erabiltzea erabaki nuen. Hala, gero barnetegira joan nintzen, Forura. Oso polita izan zen. B2 ziurtagiria lortu eta nire helburua betea nuen: euskalduna nintzen. Gero, Arratiara joan eta C1 mailako egiaztagiria lortzeko prestatzen hasi nintzen. Dena den, ordurako bizitza euskaraz egiten nuen.
Zer izan da zailena zuretzat? Gramatikalki, ikaste prozesuan, nominalizazioa. Baita ergatiboa eta aditzak ere. Eta esaldien ordena ere bai: nahiz eta ulertu, berba egitean aditzak hasieran sartzen ditut. Pertsonalki, zailena izan zen Arratiara etortzea eta ezer ez ulertzea. Euskara batutik euskalkirako jauzia shock hutsa izan zen. Hiru hilabeteko kontua izan zen, ondoren dena ulertzen nuen.
Eta errazena? Berba egiten hastea. Lotsa kendu, eta berba egiten hasi nintzen, euskañolez. B1 mailan nengoela, Berbalagunen hasi nintzen, eta horri esker hasi nintzen euskañolez egiten eta poliki-poliki ausartzen. Lotsa barik oso erraza da erabiltzen hastea.
Gustuko hitza edo esamoldea? Poliki-poliki gozatzen da biziki. Oso urduria naiz, beti nabil korrika, eta entzun nuenean pila bat gustatu zitzaidan. Neure buruari egunero esan behar diot.
Trikimailuren bat? Motibazioa eduki. Barnekoa, eta gero kanpokoa bilatu. Eta lotsa kendu; bestela, ez bazara berba egiten hasten, ezin duzu hizkuntzarik ikasi. Hortaz, motibazioa aurrera eta lotsa pikutara!
