Pentsatzeko gogo gutxirekin harrapatu nauzue gaurkoan, eta gai arin samarra aukeratuko dudala erabaki dut. Sakelakoa gero eta gauza gehiagorako erabiltzen dugu: lanerako, erosketak egiteko, gure diru apurrak kudeatzeko, lagun eta senideekin harremanetan egoteko, albisteak jasotzeko... eta, nola ez, jolasteko ere bai, denbora-pasa soil gisa.
Berez, ondo pentsatuz gero, telefonoaren erabilerarik ohikoenek zerikusi handia dute aisialdi eta denbora-pasarekin: mezularitza sistemak, argazkiak eta pasadizoak partekatzeko sareak... eta, gutxi-asko, sakelakoa dugun gehien-gehienok jausi gara inoiz tentazioan, eta jokoren bat instalatu dugu, tarteka autobusean edo trenean goazela partida laburrak jokatzeko baino ez bada ere.
Aditu askok diote bideojokoek hain bilakaera, presentzia eta eragin handia lortu dutela, non dagoeneko gure ingurune kulturaleko “zortzigarren artea” bilakatu zaizkigun. Eta hori entzunda, ai!, euskaldun gisa deblauki datorkigu galdera hau burura: “Hara, eta euskarak, euskal kulturak, ba ote du presentziarik bideojokoen arte horretan?”.
Tira, bistan da ez garela superpotentzia bat, Japonia edo AEBak bezala, baina gauzatxoak baditugu. Sakelakorako hitz jokoen esparruan, adibidez, Egunean Behin joko arrakastatsua, Eibarko CodeSyntax enpresak garatua; duela aste gutxi batzuk, bost urte bete zituen, eta euskaraz ez ezik, beste hizkuntza batzuetan ere jokatzen da egun, katalanez eta gaelikoz, kasu. Ez da munduko jokorik sofistikatuena izango, baina gure artean arrakasta handia lortu du: bost urte hauetan, 220.000 jokalari bildu ditu, eta nazioarteko bertsioak ere oso ondo funtzionatzen ari dira.
Eskuko telefonorako hitz jokoekin jarraituta, hor dauzkagu Wordle eta Berbaxerka ere, beste hizkuntza batzuetan ere oso azkar hedatu diren bideojoko sinpleak, batez ere norberaren buruaren kontra jardutekoak. Horiek ere oso denbora-pasa egokia dira etxetik lanerako joan etorrietarako, adibidez.
Baina mundua ez da sakelako hitz joko sinpleetan bukatzen, noski. Euskal bertsozaleak, literaturazaleak edo zinemazaleak ditugun bezalaxe, bideojokozaleak ere baditugu: Gamerauntsia komunitatearen inguruan batzen dira haietako asko eta asko. Ezagutzen al dituzu?
LOTURAK
https://gamerauntsia.eus
Euskal bideojokozaleen komunitatea. Bideojokoen gaineko albisteak, partiden zuzeneko emanaldiak, joko ezagunen euskarazko itzulpenak...
https://labur.eus/ebehin
Egunean Behin jokoaren 5. urteurrenari buruzko informazioa, haren sortzaile CodeSyntaxeko lagunen eskutik.
https://berria.eus/berbaxerka
Berria egunkariaren Berbaxerka jokoa, euskarazko hiztegia lantzeko ezin egokiagoa!
