Joxe Rojas
Galdetu zalantzak teknopatari:
Azken urteotan, hainbat aldiz esan dut neurri batean eskerrak ematen dizkiodala Elon Musk ahoberoari, sekula baino argiago utzi digulako zer diren benetan ‘sare sozial’ izenez ezagutu ditugun propaganda eta desinformazio plataformak. Susmoa dut laster antzeko zerbait gertatuko zaidala Donald Trumpekin, beste horrenbeste kontu argi baino argiago uzteagatik.
Orain arte ez diogu ia erreparatu, zoriontsu eta axolagabe bizi izan gara itxuraz, behintzat, “ondo funtzionatzen duten” hainbat zerbitzu eta produktu erabiltzen. IKT kontuetan, GAFAM deritzonaren besoetara botata bizi gara: Google, Apple, Facebook, Amazon, Microsoft. Gure ordenagailu eta telefonoen % 99,9ren sistema eragileak, informazio kanalak, online erosketak, kultur edukien kontsumoa, maila pertsonaleko zein profesionaleko komunikazioa...
NATOren kasuan bezalaxe, AEBekiko mendekotasun teknologikoari ez diogu kasurik egin itxura erdifuntzionala izan duen bitartean. Baina orain, Trump eta haren gorte zoroa era guztietako barrabaskeriak bata bestearen atzetik egiten hasi direnean, puxika aurpegi pare-parean lehertu zaigu. IKTen alorreko multinazionalak aniztasun eta berdintasun politikak eta edukien egiaztatze sistemak deuseztatzera behartu dituzte (erresistentzia oso gutxi topatu dute, dena esate aldera), Europako hiritarron datu pertsonalen erabilera duina bermatzen zuen nazioarteko hitzarmena egun batetik bestera eta aldebakartasunez indargabetu dute, beste estatuekiko merkataritza harremanak bonbardatzen ari dira... Aliceren kapelagile zoroaren askari handia hasi besterik ez da egin.
Urgentea da gure komunikazio tresnak eta kanalak ero kuadrilla horren atzaparretatik ateratzea. Jakina da mendekotasuna aspalditik erabiltzen ari direla muturreko ideologia toxikoak hedatu eta zilegitasuna irabazteko. Baina, gainera, edozein unetan erabaki dezakete oinarrizkoak zaizkigun IKT zerbitzu eta produktuen baldintzak arbitrarioki eta goitik behera aldatzea: atzerritarroi prezioa hirukoiztea edo zerbitzua ukatzea... Serio: putzu horretatik korrika ateratzeko garaia da, atzera begiratu ere egin gabe!
LOTURAK
https://fedibertsoa.eus/
Badakizu sare sozialetan Meta, X eta TikToken eragin toxikotik kanpo jardun dezakezula?
https://degooglisons-internet.org/
Frantziako Framasoft elkartearen webgunea, Googletik ateratzeko zerbitzu alternatiboak ematen dituena.
https://linuxmint.com/
Linux Mint PC zein Mac ordenagailuetarako sistema eragile librea, doakoa eta Trumpen administraziotik kanpokoa.
