Korrikak bere aplikazioa berritu du, 24. Korrikari buruzko albiste nagusiak, nobedadeak eta informazio garrantzitsuena euskaltzale guztiekin partekatzeko asmoz. Izan ere, aurtengoa Korrikarik gabeko urtea izan arren, AEK eta Korrika dagoeneko buru-belarri dabiltza hurrengoaren prestaketan. Bitartean, Korrika maite dutenen fideltasuna eskertzeko, hilero-hilero zozketa bereziak egingo dira aplikazio berria instalatuta dutenen artean. Lehenengoak abenduan egin ziren, baina oraindik ere aukera asko dago, hurrengo zozketak urtarrilaren 17an, otsailaren 14an, martxoaren 14an, apirilaren 18an, maiatzaren 16an eta ekainaren 12an egingo baitira, hurrenez hurren. Eta zer zozkatuko du Korrikak? Bada, Esne Beltza taldearen azken kontzerturako sarrerak, Korrika katiluak, Berria egunkariarekin batera Korrikaren 44. urteurrenagatik sortutako trixerta, Praktikatu Zerbitzuaren opari kutxa, Malum Rex jatetxerako 50 euroko bonua eta AIZU! aldizkariaren harpidetza digitalak. Parte hartzea oso erraza da: QR kodea eskaneatu eta, behin aplikazio berria jaitsita, nahikoa da horren bidez jasoko duzuen inprimakia betetzea. Badator!
