Lakuntzan uztailaren amaieran ospatutako Hatortxu Rock jaialdi solidarioarekin lotuta zabaldu zen HTX30 Manifestua, han egin zen ekitaldi nazionalean. Hainbat alderdi politiko, sindikatu, eragile, herri mugimendu zein norbanakok sinatu zuten, baita AEKk ere, bat egiten duelako “Euskal Herriak bizi izan duen gatazka politikoaren ondorioak gainditzeko garaia den ustearekin, euskal preso politiko, iheslari eta deportatu guztiak etxean nahi ditugulako, eta bakean, elkarbizitzan eta auzolanean sinesten dugulako”. Artezkaritza Kontseiluko kide Maialen Begiristain izan zen AEKko ordezkaria Lakuntzako ekitaldian. Hatortxu Rock jaialdi solidarioa 1999. urteko abenduaren 25ean egin zen lehen aldiz, Berriozarren, euskal preso politiko, iheslari eta deportatuen, eta haien senideen, defentsarako tresna gehigarria izateko asmoz. Aurten, 30. edizioa bete eta gero, agur esan du.
