Durangoko Azoka ezagutzeko eta lantzeko unitate didaktikoa

Durangoko Azokak, Ikastolen Elkartearekin elkarlanean, ikastetxeetan 12 eta 17 urte bitarteko gazteekin lantzeko unitate didaktikoa prestatu du. Horrez gain, zenbait jarduera LHko 5. eta 6. mailetako ikasleentzako modukoak dira. Proposamena baliatuz¹, ikasleek Durangoko Azoka sakonago ezagutzeko eta euskal kulturan murgiltzeko aukera izango dute, euren herriko edo inguruko testuingurutik² abiatuta.

Proposamen didaktikoak euskararen eta euskal kulturaren arteko lotura kontzientea lantzea du helburu, eta kulturaren ezagutza eta sentsibilizazioa sustatu nahi ditu ikasleen artean. Horretarako, jolasak, talde-lanak eta hausnarketak³ hartzen ditu oinarri, kulturaren lanketa Euskara eta Literatura arlora ikasgaietara mugatu barik (curriculuma osatzen duten hainbat jakintza-arlotara zabaltzea da asmoa).

Unitate didaktikoak hiru fasetan antolatutako ibilbide malgua⁴ proposatzen du, eta hamar jarduera jasotzen ditu guztira. Alabaina⁵, irakasleek eta ikasleek euren testuinguruaren eta interesen arabera diseinatu ahal izango dute bidea, jarduerak aukeratuz. Lehen fasea, Girotzen eta berotzen izenekoa, Durangoko Azoka hasi aurretik egingo da, azokaren unibertsoan murgiltzeko eta bai ikasleen aurretiazko⁶ ezagutzak bai haien motibazioa pizteko. Bigarren faseak, Plazara! izenekoak, ekintzara igarotzeko proposamena egiten du, ikasleak Durangoko Azokara bertaratuta edo azokako giroa ikastetxean bertan birsortuta⁷. Azkenik, Mamiari tiraka faseak azokaren ondoren emango dio jarraipena esperientziari. 

Unitate didaktikoa Euskal Herriko hezkuntza-komunitatearen eskura jarri da, ikastetxe bakoitzak bere behar eta interesen arabera egokitu dezan.

1. Baliatu: erabili, aprobetxatu.
2. Testuinguru: contexto (es), contexte (fr).
3. Hausnarketa: reflexión (es), réflexion (fr).
4. Malgu: flexible (es), flexible (fr).
5. Alabaina: hala ere, dena den.
6. Aurretiazko: previo, -a (es), antérieure (fr).
7. Birsortu: recrear (es), recréer (fr).