Señora Sariketako finala Danontzat gaztetxean jokatuko da

Ekainaren 6an jakingo da Plentzia-Gorlizko gaztetxean nor den VI. Señora Sariketako irabazlea. Baionako eta Zizur Nagusiko kanporaketak jokatuta, sei bertsolari hauek lehiatuko dira oholtzan¹, pamela nork jantziko: Oihana Iguaran, Ana Picallo, Maider Altuna (Baionan txartela lortu zuen Nahia Etxeberriaren ordez), Kattin Madariaga, Kattalin Lizarraga eta Lide Arregi. Iratxe Legarra Nuin izango da gai-jartzailea², eta epaileak, berriz, Begoña Goiriena, Ibai Lekuona Darceles, Klari Schmidt Lizarde eta Maialen Cadavid Echevarria. Horiei aurreko urteko pameladunak batuko zaizkie epaile-lanetan.
Bestalde, aurten jokatu da lehendabizikoz³ I. Señora bertso-paper sariketa. Emakume eta sexu edo genero disidenteentzako txapelketa izan da hau ere, gai librean; lanak banaka zein taldeka aurkeztu ahal izan dira, maiatzaren 7ra arte. Lehiaketa honetako sariak ere Señora Sariketako finalean banatuko dituzte.

1. Oholtza: agertoki, eszenatoki.
2. Gai-jartzaile: bertsolariei gaiak jartzen dizkien pertsona.
3. Lehendabizikoz: lehen aldiz, aurreneko aldiz.