Urtero Australiako ekialdeko kostaldetik migrazioan igarotzen diren xibartek (Megaptera novaeangliae) estres txikiagoa jasan zuten COVID pandemiaren lehen urtean, hots, Australian konfinamendu neurri zorrotzak ezarri zituztenean. Hala ondorioztatu du Queensland-eko Unibertsitateko (Australia) zientzialari batzuen ikerketak. Australiako ekialdetik igaro ohi diren xibartak aztertu zituzten ikertzaileek, bai drone bidezko irudien bidez bai zenbait aleri hartutako gantz laginen bitartez. Marine Environment Research agerkarian kaleratu dutenez, gorputz eta energia egoera hobea antzeman zieten xibartei 2020an, baita estres maila txikiagoa eta kortisol hormona kopuru handiagoa ere. Ikertzaileen ustez, inguruan estres txikiagoa pairatu zutela iradokitzen dute emaitzek. Giza jarduera murriztu egin zenez, xibartak elikatzen diren uretan kutsadura ere txikiagoa zelako gertatu zela uste dute. Halere, hipotesiak baino ez direla nabarmendu dute, eta arrazoi gehiago egon daitezkeela. Esaterako, La Niña izeneko meteorologia fenomenoak ere eragina izan zezakeela aipatu dute.
