Esku artean duzun alea 500. zenbakia da, baina ez duzu ezer berezirik nabarituko barruko orrialdeetan, ez dugulako aparteko1 ospakizunik egingo. Ezta azaroko zenbakian ere. Zergatik? Bada, badatozelako beste gauzatxo batzuk urtea bukatzerako eta horien prestaketan jo eta su2 gabiltzalako oraintxe bertan, AIZU!ren 44. urteurrenarekin batera aldizkari eraberritua kaleratzeko. Oraingoz ez dugu pista gehiegirik eman nahi, baina AIZU! orain lagun ona bada euskara ikasteko zure prozesuan, are erabilgarriagoa eta erabiltzen errazagoa izango da abendutik aurrera, bitarteko gehiago eskainiko baitizkizu. Irakurtzeko antiojoak eta denbora-pasak egiteko arkatza ez ezik, pantaila, teklatua eta sagua ere baliatu ahal izango dituzu euskara prozesuan gehiago sakontzeko. Laster, zauden mailan zaudela, ikastaldean, irakaslearen laguntzaz edo bakarka, beti topatuko duzu aldizkaria baliatzeko moduren bat. Zer, irrikaz3?
1. Aparteko: berezi, ohikoa ez dena.
2. Jo eta su: atseden hartu gabe.
3. Irrika: gogo handi, gogotsu.
