Ikerketa berri baten arabera, E. coli bakterioa erabil daiteke, botilen plastiko arruntarekin1 batera, parazetamola ekoizteko2 (bakterio hori lasai asko bizi da gure digestio sisteman, aldaera batzuk toxina kaltegarriak sortzeko gai izan arren). Bada, plastikoak eta parazetamolak badute zerbait komunean: biak sintetizatzen dira hidrokarburoetatik abiatuta. Hori dela eta, ikerketaren arduradunek frogatu nahi izan dute baten hondakina lehengai3 gisa balia daitekeela bestearen fabrikazioan: “Plastikoa ez da soilik erabili eta botatzeko edo plastiko gehiago ekoizteko produktua: mikroorganismoek bestelako produktu baliotsua bihur dezakete, gaixotasunak tratatzeko botika, adibidez”, azaldu du Stephen Wallace ikerketaren egileetako batek. Parazetamolaren kasuan, 24 ordu eskaseko prozesua da, giro tenperaturan egin daitekeena (energia gutxiago xahutzen4 da, beraz). Harri batez, bi kolpe5: plastikozko hondakinak farmakoen ekoizpen jasangarrirako erabili. Orain dator hurrengo erronka, industria ekoizpenerako prozesu errentagarria izatea.
1. Arrunt: normal, ohiko.
2. Ekoitzi: produzitu.
3. Lehengai: materia prima (es), matière première (fr).
4. Xahutu: gastatu, kontsumitu.
5. Harri batez, bi kolpe: dos pájaros de un tiro (es), d’une pierre deux coups (fr).
