Seigarren urtez jarraian, Finlandia izendatu dute munduko herrialderik zoriontsuena Zoriontasunaren Munduko Indizean. Gallup Institutuak egiten du sailkapena, NBE Nazio Batuen Erakundeak sustatuta. Zoriontasun maila neurtzeko, hainbat faktore hartzen ditu aintzat: per capita errenta, gizarte babesa, bizi itxaropena, oinarrizko erabakiak hartzeko askatasuna edota ustelkeriarik eza. Aurten, gainera, Ukrainako gerraren edota COVID-19aren eragina ere kontuan hartu dute. 2023ko sailkapenean, herrialde hauek daude Finlandiaren ondoren: Danimarka, Islandia, Israel, Herbehereak, Suedia, Norvegia, Suitza, Luxenburgo eta Zeelanda Berria. Azken postuan, aldiz, Afganistan ageri da. Euskal Herriari dagokionez, Frantziaren eta Espainiaren emaitzei erreparatu behar: 21. eta 32. ageri dira zerrendan, hurrenez hurren. Hori bai, 2022tik biek egin dute atzera.
