WikiEmakumeok sareari esker, dagoeneko 10.000 baino gehiago dira Euskal Wikipedian aurki daitezkeen emakumeen biografiak. Mentxu Ramilo Araujo politologoaren ekimenez osatu zen WikiEmakumeok, 2015. urtean, zenbait helbururekin. Batetik, hainbat esparrutako emakumezko erreferenteak eta aitzindariak bilatzea, haien ibilbidea eta lanak sarean bistaratzeko eta euskarazko material didaktikoa sortzeko. Hala, emakume horien biografiak sortu, sarean beste hizkuntza batzuetan daudenak itzuli eta euskarazko Wikipedian dauden biografia zirriborroak osatzen eta zuzentzen dituzte. Bestetik, emakumeen biografia kopurua handitzeaz harago, emakume editoreen eta emakumeei buruz genero ikuspegiarekin argitaratzen duten pertsonen kopurua handitzen ere saiatzen dira. Guztia, sareko genero arrakala murrizteko eta pertsona esanguratsuen bilaketa orekatzeko.
