Nork ez du inoiz ikusi erretiratu1 saldoa2 herriren bateko obrei begira eta, batzuetan, baita langileei aholkuak ematen ere? Bada, Italiako Villasanta herrian rol ofizial bilakatu dute jubilatu askoren ohitura dena. Hau da, jubilatuen denbora-pasa Udaleko parte hartze zerbitzu bihurtu dute. Nola? Borondatezko hiri zerbitzu bilakatuta. Erretiratuek herriko lanak ikuskatzen3 dituzte. Soldatarik ez dute jasotzen, baina txandak ezarri dizkiete (egunero bi ordu), istripuetarako asegurua ere bai, eta Udalaren aitortza sinbolikoa egiten zaie. Beren txandetan, erretiratu boluntarioek herri lanak ikuskatzen dituzte, edo herrian topa ditzaketen arazoen berri ematen dute. Eta, nola ez, lanean ari diren langileei aholkuren bat edo beste ematen diete... Hori bai, ez nolanahiko aholkuak. Izan ere, jubilatu “ikuskatzaileen” taldean izena eman duten askok eskarmentua dute halako ofizioetan: igeltseroak4, elektrikariak... izandakoak dira. Finean, jubilatu askoren bokazioa herria hobetzeko bide bihurtu dute Villasantan.
1. Erretiratu: jubilatu.
2. Saldo: talde, multzo.
3. Ikuskatu: inspeccionar (es), inspecter (fr).
4. Igeltsero: albañil, -a (es), maçon, -onne (fr).
