Europan drogak hartzen dituzten helduen artean, kalamua da gehien kontsumitzen dena. Zehazki, drogak kontsumitzen dituzten europar helduen % 59k kalamua hartu dute azken urtean. Hala jakinarazi du EUDA Europar Batasuneko Drogaren Agentziak (European Union Drugs Agency), 31 herrialdetako 66.000 pertsona helduri inkesta egin ondoren. Kalamuaren ostean, MDMA eta kokaina dira gehien hartzen direnak: % 30ek eta % 29k kontsumitu dituzte azken urtean, hurrenez hurren. Gero, onddo haluzinogenoak (% 18) eta anfetamina (% 17) datoz. Bestelako datuak ere bildu dituzte inkestan, droga kontsumitzeko arrazoiak, esaterako: kalamuari dagokionez, % 60k estresa murrizteko edo erlaxatzeko hartzen dute. Nolanahi ere, ongi pasatzeko eta/edo burua arintzeko egiten dutenak asko dira, bai kalamuarekin bai beste droga gehienekin: MDMA, kokaina, ketamina... Drogak kontsumitzeko moduari dagokionez, ohikoena hainbat nahastea da. Gehien nahasten dena kokaina da.
