Irailaren 28an Urdulizen hasi eta abenduaren 20an Bilbon amaituko da 2025eko Bizkaiko Bertsolari Txapelketa. Egitura aldaketa izango du oraingoan, baita finala lehiatzeko lekua ere: aurreko aldietan Bilbao Arenan egin ondoren, aurten Bilboko Casillan egingo da. Egiturari dagokionez, lehen fasean bost saio jokatuko dira, eta finalaurrekoak bi bueltara izango dira. Lehenengo fasean 30 bertsolarik parte hartuko dute, eta 11 sailkatuko dira finalaurrekoetarako lehen itzulirako1. 2023an finalista izan ziren 7 bertsolariak zuzenean sailkatuko dira finalaurrekoetarako lehen buelta horretarako. Hala, lehen itzulian 18 bertsolari lehiatuko dira. Horietatik 12 igaroko dira bigarren bueltara, eta bi itzulietako puntuazioak batuta erabakiko da finalean nor ariko diren. Txapelketako saioetarako sarrerak www.bertsosarrerak.eus webgunean eros daitezke.
1. Itzuli: buelta.
