Jaki1 pikanteak ohikotasunez jateak lotura izan dezake gaitz kardiobaskularren eta zerebrobaskularren gutxitzearekin, Chinese Journal of Epidemiology aldizkarian kaleratutako ikerketa batek ondorioztatu duenez. Txinako Chengduko Medikuntza Elkargoko aditu talde batek Pengzhou hiriko 50.000 herritarren elikadura ohiturak aztertu ditu 21 urtez, besteak beste piper minak2 jateko maiztasuna3, gustuko pikante mota eta kontsumitzeko moduak. Emaitzen arabera, gaixotasun kardiobaskularrak edo zerebrobaskularrak izateko arriskua % 11 txikiagoa zen astean sei edo zazpi aldiz jaki minak jaten zituztenen artean gutxitan jaten zituztenen artean baino. Gainera, kardiopatia iskemikoak jasateko arriskua % 12 apalagoa zuten. Gaixotasun horiek pairatzeko4 probabilitatea % 14 murrizten zen mina neurrian gustuko zutenen artean, % 9 mina oso gogoko zutenen artean eta % 7 zapore suabeagoa nahiago zutenen artean. Ikertzaileek ez dute lotura horren zergatia identifikatu, datu gehiago beharko lituzketelako. Hori bai, edozein modutan kontsumituta eragiten omen du onura.
1. Jaki: janari, elikagai.
2. Min: pikante.
3. Maiztasun: asiduidad (es), assiduité (fr).
4. Pairatu: jasan, sufritu, nozitu.
