Otsaileko AIZU!n aurreratu genizuenez, irailaren 27an Euskal Herriko Ardi Ile Moztaileen1 Txapelketa jokatuko da lehen aldiz, Abadiñon. Euskal Ardi Moztaileen Elkarteak (EAME) antolatua, Euskal Herrikoa ez ezik, nazioartekoa ere jokatuko da. Udan, xehetasun gehiago eman dituzte antolatzaileek. Esaterako, nazioen lehiaketan Euskal Herria, Eskozia, Irlanda, Herbehereak, Frantzia, Espainia eta Alemaniako moztaileak ariko direla. Guztira, 60k moztuko diete ilea 700 ardiri. Bi modalitatetan jardungo dute bi txapelketetan: makinaz eta guraizeaz. Euskal Herriko Txapelketan, gainera, 2026ko martxoan Mastertonen (Zeelanda Berria) jokatuko den Golden Shears World Championship munduko txapelketarako euskal selekzioko ordezkariak aukeratuko dituzte. Lehiaz gain, egun osoan ekitaldiak izango dira Abadiñon. Informazio gehiago, https://moztaileak.eus webgunean.
1. Ardi ile moztaile: esquilador, -a de ovejas (es), tondeur, -euse de moutons (fr).
