Agur dosi bakarreko ketchup- eta maionesa-zorroei

Europako taberna eta jatetxeek aldatu egin beharko dute ketchupa, maionesa, olioa, azukrea, gatza eta antzeko gozagarriak¹ eskaintzeko modua. Izan ere, dosi bakarreko zorroak² debekatu egingo dituzte. Europar Batasunak (EB) ezarritako³ araua da, erabilera bakarreko formatuak desagerrarazteko helburuz. Horrela, plastikozko hondakinak⁴ gutxitu nahi dituzte. Araua aurtengo abuztuan sartuko da indarrean⁵. Hotelek ere egokitzapenak⁶ egin beharko dituzte, eta bezeroei ezin izango dizkiete eskaini xanpu edo higiene produktuen poto txikiak. Araua betetzeko, negozioek bestelako⁷ aukerak bilatu beharko dituzte, baina beti bezeroen beharren eta elikadura-segurtasunaren arteko oreka⁸ zainduta. Ostalaritzan, dagoeneko hasi dira aukera berriak probatzen: ontzi berrerabilgarriak⁹ edo material konpostagarriak, adibidez. Beste aukera bat da ongailuak¹⁰ bezeroek eskatzen dituztenean soilik ematea. Arauak betetzen ez dituzten establezimenduek isunak jasoko dituzte.

1. Gozagarri: aderezo (es), assaisonnement (fr).
2. Zorro: poltsa.
3. Ezarri: inposatu.
4. Hondakin: resto (es), reste (fr).
5. Indarrean sartu: entrar en vigor (es), entrer en vigueur (fr).
6. Egokitzapen: adaptación (es), adaptation (fr).
7. Bestelako: desberdin, beste era bateko.
8. Oreka: equilibrio (es), équilibre (fr).
9. Berrerabilgarri: berriz erabili ahal dena.
10. Ongailu: gozagarri.