‘Pizkundea’ ekitaldiaren ostean, egunerokoan ekiteko deia egin du Kontseiluak

Euskararen pizkundea¹ sustatzeko helburuz, iragan abenduaren 27an 6.500 euskaltzale bildu ziren Euskalgintzaren Kontseiluak antolatutako Pizkundea ekitaldian, Bilbao Arenan. Kontseiluak balorazio positiboa egin du, “larrialdi linguistikoari erantzuteko kezka eta giharra²” agerian geratu baitziren. Era berean, euskaltzaleei egunerokoan antolatzeko eta ekiteko³ deia egin die. Horretarako, Euskaltzaleon gida izeneko proposamena aurkeztu du, sei jarraibide nagusirekin: euskaraz bizitzeko hautua egin; euskara ikasteko urratsa egin; hizkuntza-eskubideen urraketak⁴ ez normalizatu; euskararen etorkizunari buruzko kezkak partekatu⁵; euskararen auziari⁶ lehentasuna eman; eta euskaltzale gisa antolatu. Dokumentua www.pizkundea.eus webgunean dago eskuragarri. Gida aurkezteaz gain, Kontseiluak mobilizazioa deitu du, ekainaren 13rako, Iruñean.

1. Pizkunde: renacimiento (es), renaissance (fr).
2. Gihar: músculo (es), muscle (fr).
3. Ekin: acometer (es), entreprendre (fr).
4. Urraketa: violación (es), violation (fr).
5. Partekatu: konpartitu, elkarbanatu.
6. Auzi: arazo, gatazka.