Jaguarrak gehitzen ari dira Hego Amerikan

Jaguarra (edo yaguaraté-a), Amerikako felido¹ handiena, berreskuratzen² ari da. Mexikon, adibidez, Jaguarra Kontserbatzeko Aliantza Nazionalak esan du animaliaren populazioa % 10 hazi dela azken sei urteetan. Beraz, kontserbazio proiektuak arrakasta³ dauka. Bestalde, Argentinan yaguaraté kume⁴ bat jaio zen iaz⁵, El Chaco eskualdean, 30 urteren ondoren. Uztailean ikusi zuten Bermejo ibaiaren ertzean⁶, El Impenetrable parke nazionalean. Albiste pozgarria eta garrantzitsua da: parke hori toki babestua⁷ da eta bertan animaliak zaintzen dituzte. Horregatik, parkeko zaindariek ezagutzen dute kumearen ama: Nalá da, eta itxian⁸ jaio zen. 2024ko abuztuaren 18an askatu zuten, parkean zainduta bizitzeko eta espeziea indartzeko. Ugaztun⁹ hau ekosistemarako giltzarria¹⁰ da eta garrantzi kultural handia dauka kontinente amerikarrean.

1. Felido: félido, -a (es), félin (fr).
2. Berreskuratu: recuperar (es), récupérer (fr).
3. Arrakasta: éxito (es), succès (fr).
4. Kume: cría (es), petit (fr).
5. Iaz: el pasado año (es), l'an dernier (fr).
6. Ertz: margen (es), bord (fr).
7. Babestu: proteger(se) (es), (se) protéger (fr).
8. Itxian: en cautividad (es), en captivité (fr).
9. Ugaztun: mamífero, -a (es), mammifère (fr).
10. Giltzarri: clave (es), clé (fr).