Milaka herritar elkartu ziren Euskaltzaleon Martxan, pasa den ekainaren 13an, Iruñean. Hiru zutabek zeharkatu zituzten hiriko kaleak, “euskaraz bizitzeko behar den dena” aldarrikatzeko. Hau da, ofizialtasuna, hizkuntza-politiketan egin beharreko jauzia eta euskaltzaletasuna. Euskalgintzaren Kontseilua “gustura” agertu zen mobilizazioaren emaitzarekin, berriro ikusi zelako “euskarari etorkizuna emateko herri-gogoa bizirik eta indartsu dagoela”. Erronka ere bota zuen Kontseiluak:  2036. urterako 300.000 euskaldun gehiago lor­tzea eta % 20ko erabilera-langa1 gaindi­tzea. Erronka anbiziotsua, baina “aldi berean, egingarria2”. Euskarak premiazkoa duen Pizkunderako beste txinparta3 bat piztu zen, hortaz, Nafarroako hiriburuan. Horren harira, Kontseiluko arduradun Idurre Eskisabelek honela animatu zituen bertan bildu zirenak: “Jabetu4, ahaldundu eta antolatu, euskaraz bizitzeko behar den dena eratu arte. Ez ahaztu mundua euskararen kontra datorrela, baina guk mundua dugula euskararen alde. Eta esan dezagun ozen: Euskal Herrian euskaraz!”.

1. Langa: muga, tope.
2. Egingarri: egin ahal dena, egiteko modukoa dena.
3. Txinparta: chispa (es), étincelle (fr).
4. Jabetu: ulertu, ohartu, konturatu.

Harpidedunentzako sarbidea:

Gogora nazazu

Hil honetako AIZU! aldizkarian erreportaje gehiago aurkituko dituzu. Horrez gain, “Ez da hain fazila” gehigarria ere eskura dezakezu. Hainbat eduki biltzen ditu: "Galde Debalde?" ataltxoa gramatika-zalantzak argitzeko, denbora-pasak, lehiaketak... Kioskoetan salgai, harpidetza ere egin dezakezu, digitala nahiz paperekoa. Klikatu hemen.