Zientziaren arabera besarkada perfektua nolakoa den zehazten saiatu da Londreseko Unibertsitateko (Erresuma Batua) ikertzaile talde bat. Horretarako, bi esperimentu egin dituzte. Lehena, 45 unibertsitate ikaslerekin, laborategi batean: begiak estaliak zituztela, sei aldiz besarkatu zituen ikertzaile batek. Bigarrenean, 100 ikasle pareri elkar besarkatzeko eskatu zieten, unibertsitateko campusean. Bi besarkada mota aztertu zituzten: gurutzatua (elkar besarkatzen duten bi lagunen besoak gurutzatuta) eta lepo-gerri besarkada (baten besoak lepoaren inguruan eta bestearenak gerriaren inguruan). Besarkaden iraupena ere neurtu zuten. Laborategian, 5 eta 10 segundo arteko besarkadak jo zituzten atseginentzat, laburragoekin alderatuta. Campusean, besarkada gurutzatua izan zen gustukoena, batez ere gizonezkoen artean. Ikasle gehienek azaldu zutenez, lepo-gerri besarkada intimoagoa iruditu zitzaien. Nolanahi ere, ikertzaileek onartu dute ikerketa hankamotz samarra dela, faktore ugari ez dutelako kontuan hartu: elkar besarkatzen ari zirenen arteko harreman mota, altuera...