Azken 50 urteetan, pop abestien hitzak¹ sinpleagoak eta ezkorragoak² bilakatu³ dira, eta estresaz gehiago hitz egiten dute. Hori dio Scientific Reports aldizkarian argitaratutako ikerketa batek. Horretarako, 1973tik 2023ra AEBetan gehien entzundako abestien hitzak aztertu dituzte, guztira 20.000, besteak beste Elton John, Diana Ross, Taylor Swift eta Beyoncerenak. Ikertzaileen arabera, emaitzak gizartearen joerekin⁴ bat datoz⁵. Izan ere⁶, depresio, antsietate eta estres tasak igo egin dira azken urteetan. Hitzen konplexutasuna PISA azterketekin lotu dute: ikasleen puntuazioa baxuagoa da, eta adimen kozientea⁷ ere gutxitu egin da. Hala ere, badira salbuespenak⁸: gertakari traumatikoen ondoren, jendeak nahiago ditu abesti baikorrago eta konplexuagoak. Adibidez, 2011ko irailaren 11ko erasoaren ostean⁹. Ikerketak baditu bere mugak. Esaterako¹⁰, hitzak bakarrik aztertu dituzte, musika ez. Gainera, soilik AEBetako abesti ezagunak hartu dituzte kontuan.

1. Hitz: letra.
2. Ezkor: pesimista (es), pessimiste (fr).
3. Bilakatu: devenir (es), devenir (fr).
4. Joera: propensión (es), propension (fr).
5. Bat etorri: concordar (es), concorder (fr).
6. Izan ere: ciertamente (es), certainement (fr).
7. Adimen koziente: cociente intelectual (es), quotient intellectuel (fr).
8. Salbuespen: excepción (es), exception (fr).
9. Ostean: ondoren, eta gero.
10. Esaterako: adibidez, kasurako.